«ەلوردا كۋبوگى» حالىقارالىق ءتۋرنيرى بۇگىن اياقتالادى. 4 شىلدەدە فينالدىق جەكپە-جەك ءوتىپ، ەرلەر اراسىندا 13 چەمپيون، قىزدار اراسىندا 12 چەمپيون انىقتالادى. تۋرنير جاقسىلىق ۇشكەمپىروۆ اتىنداعى جەكپە-جەك سارايىندا ءوتىپ جاتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان بوكس فەدەراسياسىنىڭ مالىمەتىنشە، ەرلەر اراسىندا قازاقستاننىڭ 54 بوكسشىسى سىنعا تۇسكەن. سونىڭ 16-سى فينالعا جولداما الدى. ءتىپتى، كەيبىر سالماق دارەجەسىندە قايرات ءساتجانوۆ شاكىرتتەرى فينالعا بەرىلەر جولدامانى ءوزارا ساراپقا سالۋعا ءماجبۇر بولدى. وسىلايشا كوشباسشى بوكسشىلارىمىزدىڭ ناعىز بابىندا ەكەنى قۋانتتى. بۇل جەرلەردە سوڭعى الەم چەمپيوناتىنىڭ فيناليستەرى - تەمىرتاس ءجۇسىپوۆ، ساكەن بيبوسىنوۆ، ماحمۇد سابىرحان سىندى ساڭلاقتارىمىزدى ەرەكشە اتاپ وتكەن ءجون. ەندى ولار «ەلوردا كۋبوگىنىڭ» چەمپيوندىق اتاعىن جۇڭگو، كۋبا، وزبەكستان بوكسشىلارىنا قارسى ايقاستا ساراپقا سالادى. ايتا كەتەيىك، جارتىلاي فينال كۇنى قازاقستان اۋەسقوي بوكسىنىڭ قازىرگى تاڭداعى جارقىن جۇلدىزى ساكەن بيبوسىنوۆ 25 جاسقا تولدى. سونىمەن قاتار، جارتىلاي فينالعا اعايىندى-ەگىزدەر ءساماتالى مەن ءساناتالى تولتايەۆتار جانە ايبەك، نۇربەك ورالبايدار دا شىقتى. ال فينالداعى ەڭ قىزىقتى جەكپە-جەكتەردىڭ ءبىرى 71 كەلى سالماق دارەجەسىندە ءوتۋى ءتيىس. مۇندا جەرلەسىمىز اسلان شىمبەرگەنوۆ الەم چەمپيونى، جاپون سيەۆون وكازاۆامەن ايقاسادى. ايەلدەر بوكسىنا كەلەر بولساق، باس باپكەر ءشامىل سافيۋللين سەنىم ارتقان 45 ارۋىمىزدىڭ جەتەۋى باس جۇلدەگە تالاسپاق. مۇندا باسەكە تىپتەن جوعارى. ەلورداعا الەم مىقتىلارى - جۇڭگو مەن ءۇندىستان كەلگەن.
سونداي-اق، سوڭعى كەزدەرى كورشى وزبەكستان قىزدارى دا قارقىن العان. قىزدار دا بارىن سالىپ جاتىر. اسىرەسە، مارينا ۆولنوۆانىڭ ەرلىگىن اتاپ وتپەسكە بولمايدى. قازاقستان ايەلدەر بوكسىنان تۇڭعىش بولىپ وليمپيادا جۇلدەسىن جەڭىپ العان مارينا 75 كەلىدە فينالعا شىقتى. ونىڭ اقتىق ايقاستاعى قارسىلاسى - جۇڭگو بوكسشىسى. ودان بولەك، جاينا شەكەربەكوۆا مەن كارينا يبراگيموۆا دا ۇستەمدىگىن بايقاتىپ، فينالعا شىقتى. ال فينالداعى بوكسشىلارىنىڭ سانى بويىنشا قازاقستان ارۋلارى تەك قىتايعا جول بەرىپ تۇر.
فينالدىق جەكپە-جەكتەر 4 شىلدەدە ەلوردا ۋاقىتىمەن ساعات 14:00-دە باستالادى.