ەلىمىزگە تاۋارلاردى باج سالىعىنسىز اكەلۋ نورماسى وزگەرەدى

كورسەتىلگەن شەكتەن اسىپ كەتسە، قۇننىڭ 30% مولشەرىندە باج سالىعىن تولەۋ كەرەك.

قازاقستاندا 1 قازاننان باستاپ شەكارا وتكەلىندە تاۋارلاردى باج سالىعىنسىز اكەلۋ نورمالارى وزگەرەدى، دەپ حابارلايدى Almaty-akshamy.kz

مەملەكەتتىك كىرىستەر دەپارتامەنتىنىڭ مالىمەتىنشە، 1 قازاننان باستاپ قۇرلىق شەكاراسىنان وتەتىن ازاماتتار قۇنى 500 ەۋرودان (قازىرگى ۋاقىتتا 1000) جانە سالماعى 25 كەلىدەن (قازىرگى ۋاقىتتا 31 كەلى) اسپايتىن تاۋارلاردى باج سالىعىنسىز اكەلە الادى.

ۆەدومستۆودا اتاپ وتكەندەي، ەگەر كورسەتىلگەن شەكتەن اسىپ كەتسە، قۇننىڭ 30% مولشەرىندە باج سالىعىن تولەۋ كەرەك. ءبىراق 1 كەلى اسىپ كەتسە 4 ەۋرودان كەم ەمەس.

«ەۋرازيالىق ەكونوميكالىق وداقتىڭ كەدەندىك اۋماعىنا تاسىمالداۋشى جەتكىزگەن نەمەسە حالىقارالىق پوشتا ارقىلى جونەلتىلەتىن جەكە پايدالانۋعا ارنالعان تاۋارلارعا قاتىستى 2022 جىلعى 1 قازاننان باستاپ تاۋارلاردىڭ قۇنىنىڭ كريتەرييلەرى 1000 ەۆرودان 200 ەۋروعا دەيىن تومەندەتىلدى. سونىمەن قاتار سالماق شەگى قولدانىستاعى شەكتەردە قالادى (31 كەلىگە دەيىن)»، - دەلىنگەن مەملەكەتتىك كىرىستەر دەپارتامەنتىنىڭ حابارلاماسىندا.

تەمەكى

ليميت وزگەرىسسىز قالادى - 200 تەمەكى نەمەسە 50 سيگارا (سيگاريللا)، نەمەسە 250 گ تەمەكى نەمەسە 18 جاستان اسقان جەكە ادامعا جالپى سالماعى 250 گ اسپايتىن اسسورتيمەنتتەگى كورسەتىلگەن ونىمدەر.

الكوگول

الكوگولدى باج سالىعىنسىز اكەلۋ مولشەرلەمەسى دە وزگەرىسسىز قالادى – 18 جاستان اسقان جەكە ادامعا 3 ليتر.

2022 جىلدىڭ 28 ساۋىرىنەن باستاپ كۇشىنە ەنگەن ستاۆكانى كوتەرۋ تۋرالى ۋاقىتشا شەشىمنىڭ مەرزىمى اياقتالاتىندىقتان، 2022 جىلدىڭ 1 قازانىنان باستاپ جەكە تۇلعالاردىڭ جەكە پايدالانۋعا ارنالعان تاۋارلاردى باج سالىعىنسىز اكەلۋ مولشەرلەمەسى تومەندەيدى.