ەلىمىزگە ەڭبەك ميگرانتتارىنىڭ كوبى قىتايدان كەلەدى

قازاقستاندا 14 مىڭنان استام شەتەل ازاماتى جۇمىس ىستەيدى. 

باسىم بولىگى قۇرىلىس سالاسىندا ەڭبەك ەتەدى، دەپ حابارلايدى aqshamnews.kz

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، اكىمدىكتەردىڭ رۇقساتىمەن ەلىمىزدە 14 مىڭ 49 شەتەلدىك ەڭبەك ەتەدى.

شەتەلدىك باسشىلار مەن ولاردىڭ ورىنباسارلارىن جۇمىسقا تارتۋعا رۇقسات 576 ادامعا، قۇرىلىمدىق بولىمشەلەردىڭ باسشىلارى ءۇشىن 2 مىڭ 598 ادامعا رۇقسات بەرىلسە، ءۇشىنشى جانە ءتورتىنشى ساناتتاعى ماماندار مەن بىلىكتى جۇمىسشىلارعا تيىسىنشە 5 مىڭ 353 ادامعا جانە 473 ادامعا رۇقسات بەرىلگەن. سونداي-اق، ماۋسىمدىق جۇمىستارعا 1 مىڭ 899 ادام، ال كورپوراتيۆتىك اۋىستىرۋ اياسىندا 3 مىڭ 150 ادام تارتىلدى.

ءقازىر قازاقستاندا شەتەلدىك جۇمىسشىلاردى پايدالاناتىن 1 مىڭ 796 جۇمىس بەرۋشى بار. ولاردا 436،1 مىڭنان استام قازاقستاندىق جۇمىس ىستەيدى. ولار قىزمەتكەرلەردىڭ جالپى سانىنىڭ 96،8%-ىن قۇراپ وتىر.

ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا – 4 397 ادام، اۋىل، ورمان جانە بالىق شارۋاشىلىعى – 1 897 ادام، اكىمشىلىك جانە كومەكشى قىزمەتتەر – 1 592، تاۋ – كەن ونەركاسىبى جانە كارەرلەردى قازۋ – 1 293 ادام، وڭدەۋ ونەركاسىبى – 1 252 ادام.

سونىمەن بىرگە ەڭبەك ميگرانتتارى كەلەتىن نەگىزگى ەلدەر اتالدى. ولار: جۇڭگو – 4 123 ادام، وزبەكستان – 1 968 ادام، تۇركيا – 1 152 ادام، ءۇندىستان – 1 114 ادام.