ۇكىمەت پەن يسلام دامۋ بانكى كەلىسىمگە قول قويدى.
يسلام دامۋ بانكى قازاقستانداعى ينفراقۇرىلىمعا 2 ميلليارد دوللارعا دەيىن قارجى بولەدى، دەپ حابارلايدى Almaty-akshamy.kz ۇكىمەتتىڭ باسپا ءسوز قىزمەتىنە سىلتەمە جاساپ.
ورەس حالىقارالىق دامۋ قورى ۇيىمداستىرعان فورۋمدا قازاقستان پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆتىڭ اراب ۇيلەستىرۋ توبىنا كىرەتىن يسلام دامۋ ينستيتۋتتارىمەن ءبىرقاتار ەكىجاقتى كەزدەسۋ وتكىزىپ، سونداي-اق قازاقستان ۇكىمەتى مەن يسلام بانكى اراسىنداعى نەگىزدەمەلىك باعدارلامالىق كەلىسىمگە قول قويىلعانى ايتىلدى.
"كەلىسىم وسى جىلى سۋ شارۋاشىلىعى جانە كولىك سالالارىنداعى ينفراقۇرىلىمدىق جوبالاردى ىسكە اسىرۋدى باستاۋ ءۇشىن ۇزاق مەرزىمدى ينۆەستيسيالار تارتۋ تۋرالى بۇرىن قول جەتكىزىلگەن كەلىسىمدەردى بەكىتتى. يسلام دامۋ بانكى وسى ماقساتتارعا 2 ميلليارد دوللارعا دەيىن قاراجات بولەدى"، - دەلىنگەن حابارلامادا.
سۋ شارۋاشىلىعى جانە يرريگاسيا مينيسترلىگى بيىل قارجىلاندىرۋعا دايىن 16 جوبانى دايىندادى. ولارعا سۋ قويمالارىن، بوگەتتەردى، يرريگاسيالىق ارنالاردا، باقىلاۋ-رەتتەۋ جانە ولارمەن بايلانىستى ينفراقۇرىلىمداردى سالۋ جانە قايتا جاڭارتۋ كىرەدى. كولىك مينيسترلىگى جالپى ۇزىندىعى 500 شاقىرىمنان اساتىن رەسپۋبليكالىق ماڭىزى بار جولداردى قايتا جاڭعىرتۋ جانە سالۋ بويىنشا 4 جوبانى ۇسىندى.
كەلىسىم العا قويىلعان ماقساتتارعا تابىستى ىسكە اسىرۋدى جانە قول جەتكىزۋدى قامتاماسىز ەتۋ ءۇشىن بىرلەسكەن جوبالاردى ىسكە اسىرۋ بارىسىنا تۇراقتى كونسۋلتاسيالار مەن مونيتورينگ جۇرگىزۋدى كوزدەيدى.
بۇعان دەيىن حابارلاعانىمىزداي، قازاقستاننىڭ سىرتقى ىستەر ءمينيسترى مۇرات نۇرتىلەۋ جيددا قالاسىندا يسلام دامۋ بانكى مەن يسلام ىنتىماقتاستىعى ۇيىمىنىڭ باسشىلىعىمەن كەزدەسۋلەر وتكىزدى.
قازاقستان ديپلوماتيا ۆەدومستۆوسىنىڭ باسشىسى يدب پرەزيدەنتى مۇحاممەد سۇلەيمان ال-جاسەرمەن كەزدەسۋىندە قازاقستاننىڭ ەكونوميكالىق الەۋەتى تۋرالى حابارلادى.
بانك توبى قازاقستاندا قۇنى 1،6 ميلليارد دوللاردان اساتىن 70-كە جۋىق جوبانى جۇزەگە اسىردى، دەپ مالىمدەدى سىرتقى ىستەر ءمينيسترى.