ەلىمىزدىڭ عالىمدارى كۇزدىك بيداي سورتىن شىعاردى

بۇل – ايازعا ءتوزىمدى داقىل.

اتالعان سورت سىناقتان ءساتتى ءوتىپ، جاقسى جەرسىنگەن، دەپ حابارلايدى Almaty-akshamy.kz

«ۇلتتىق اگرارلىق ءعىلىمي-بىلىم بەرۋ ورتالىعىنىڭ عالىمدارى كۇزدىك بيدايدىڭ جاڭا سورتىن گيبريدتى پوپۋلياسيادان جەكە سۇرىپتاۋ ناتيجەسىندە شىعاردى»، دەپ حابارلايدى اۋىل شارۋاشىلىعى مينيسترلىگى.

"ءشول" دەپ اتالاتىن جاڭا سورت گوستيانۋم (Hostianum) گيبريدتى تۇرىنە جاتادى.

"ءشولدىڭ" تاڭعاجايىپ سيپاتتامالارىنا كەلسەك، ۇزىندىعى 8-12 سم ءسيليندرلى ماساقتارى بار، قۇرىلىمى تىعىز، 10 سم-گە جەتەتىن 14-18 تىكەنەكتى تۇكتەرى بولادى. ءدانى شىنى ءتارىزدى، جارتىلاي ۇزىن، ءىرى، قىزىل ءتۇستى، ءتۇبى تەگىس، ورتاڭعى ويىعى بار.

سورتتىڭ شارۋاشىلىق قۇندىلىعى ونىڭ جوعارى ونىمدىلىگىنەن بايقالادى. 1000 ءداننىڭ سالماعى 40،8-49،0 گ، كولەمى 757-820 گ/ل، نەگىزگى ماساقتاعى ءدان سانى 45،5-60،5 تۇيىرگە جەتەجى. ەڭ باستىسى "ءشول" سورتى قىسقى سۋىق پەن جازعى ىستىققا جانە قۇرعاقشىلىق پەن اۋرۋعا دا ءتوزىمدى.

جاڭا سورت سۋارمالارى جەرلەر مەن تىڭايتقىشتاردى پايدالانۋ جاعدايىندا ءوسىرۋ ءۇشىن ۇسىنىلادى. پىسكەن كەزدە ءدانى شاشىلمايدى جانە وڭاي باستىرىلادى. "ءشول" ونىمدىلىگى 25،5-40،5 س/گا-نى قۇرايدى.

بۇل سورت سىناقتان ءساتتى ءوتتى جانە جەرسىندىرۋ جۇمىسىندا دا جاقسى ناتيجە بەردى. عالىمدار تىڭ ونىمگە پاتەنت الىپ، اۋىل شارۋاشىلىعى كاسىپورىندارىمەن تابىستى پايدالانىلۋدا. عالىمدار مەن سەلەكسيونەرلەر جاڭا "ءشول" سورتى مول ءونىم اكەلىپ، اۋىل شارۋاشىلىعى سالاسىندا ونىمدىلىك كورسەتكىشتەرىن ارتتىرادى دەپ سەنەدى.