ەلىمىزدەگى سۋ ايدىنىنا دروندار ارقىلى مونيتورينگ جاسالادى

سۋ تاسقىنىنىڭ الدىن الۋعا بولادى

قازاقستان ماماندارى سۋ ايدىنىنا عارىشتىق مونيتورينگ جۇرگىزۋدىڭ جاڭا مۇمكىندىكتەرىنە يە بولدى، دەپ حابارلايدى Almaty-akshamy.kz Inform.kz-كە سىلتەمە جاساپ.

«قازىرگى ۋاقىتتا «قازاقستان عارىش ساپارى» ۇك» اق (قگس) قىزمەتكەرلەرى سۋ ايدىندارى ءتۇبىنىڭ بيىكتىك دەرەكتەرىن الۋعا، ولاردىڭ ءتۇبىن كارتاعا تۇسىرۋگە مۇمكىندىك بەرەتىن سيفرلىق باتيمەتريالىق ءتۇسىرىلىمدى ەنگىزۋدە»، - دەدى جەردى قاشىقتان زوندتاۋ عارىش جۇيەسى دەپارتامەنتى ديرەكتورىنىڭ ورىنباسارى بەرىك راحىمجانوۆ.

بەلگىلى بولعانداي، مەكەمە جاڭا جابدىق – قاشىقتان باسقارىلاتىن سيفرلىق درون - Apache 3 ۇشقىشسىز گيدروگرافيالىق كەشەنىن ساتىپ العان. بۇل دروندى ق ر ءبىلىم جانە عىلىم مينيسترلىگى «سولتۇستىك، ورتالىق جانە شىعىس قازاقستاننىڭ ءىرى وزەندەرى باسسەينىندە سۋ تاسقىنىن الدىن الۋ الگوريتمىن ازىرلەي وتىرىپ، كەشەندى باسقارۋدىڭ عىلىمي-قولدانبالى نەگىزدەرى» نىسانالى قارجىلاندىرۋ باعدارلاماسى شەڭبەرىندە الدى.

«بارلاۋ جابدىعىنىڭ بۇل ءتۇرى قازاقستاندا العاش رەت قولدانىلۋدا جانە بۇل ءتاسىلدى «ءدال گيدرولوگيا» دەپ اتاۋعا بولادى. الىنعان مالىمەتتەر شىنايىلىق، ناقتىلىق جانە اقپاراتتى جيناۋدىڭ جوعارى تيىمدىلىگىمەن ەرەكشەلەنەدى»، - دەپ اتاپ ءوتتى ب.راحىمجانوۆ.