2025 جىلعا دەيىن ەلىمىزدە 113 سپورت نىسانى سالىنىپ، 26-سى جوندەلەدى.
2025 جىلعا دەيىن ەلىمىزدە 113 سپورت نىسانى سالىنىپ، 26 سپورت نىسانى جوندەلەدى. بۇل مالىمەتتەردى ق ر مادەنيەت جانە سپورت ءمينيسترى اسحات ورالوۆ تۇركىستان تۇرعىندارىمەن كەزدەسۋىنە ايتتى، دەپ حابارلايدى اlmaty-akshamy.kz قازاقپاراتقا سالتەمە جاساپ.
«مادەنيەت جانە سپورت ءمينيسترى رەتىندە العاشقى ەسەپ بەرۋ كەزدەسۋىن وتكىزدىم. جۇمىس ساپارى قازاقستاننىڭ رۋحاني استاناسى - تۇركىستان قالاسىنان باستالدى. ەسەپ بەرۋ كەزدەسۋىنە ءوڭىردىڭ 400-دەن استام تۇرعىنى قاتىستى. ولاردىڭ ىشىندە مادەنيەت، سپورت جانە تۋريزم سالالارىنىڭ قىزمەتكەرلەرى، جۋرناليستەر، جوو وقىتۋشىلارى، ۇكىمەتتىك ەمەس ۇيىمدار مەن بيزنەس وكىلدەرى جانە قوعام دامۋىنا بەي-جاي قارامايتىن ازاماتتار بار. كەزدەسۋ 2 ساعاتتان استام ۋاقىتقا سوزىلدى. ۋاقىتتىڭ كوپ بولىگى تۇرعىنداردىڭ سۇراقتارىنا جاۋاپ بەرۋگە ارنالدى»، - دەدى مينيستر.
ونىڭ سوزىنشە، كۇن تارتىبىندە ونوماستيكالىق كوميسسيا جۇمىسىنىڭ تۇجىرىمداماسىن جاڭارتۋ قاجەتتىلىگى، تۇركىستان وبلىسىنىڭ شاعىن ەلدى مەكەندەرىندە سپورت كلۋبتارى مەن مادەنيەت ۇيلەرىن سالۋ، «تۇران» بالالار فۋتبول اكادەمياسىن قولداۋ، سپورت اكادەمياسى وقىتۋشىلارىنىڭ ەڭبەكاقىسىن كوتەرۋ، سپورتتىق جانە مادەني مەكەمەلەردىڭ جۇمىسىن باعالاۋ مەن قارجىلاندىرۋ كەزىندە رەيتينگتىك جۇيە ەنگىزۋ، جاس سپورتشىلارعا ارنالعان جاتاقحانالار سالۋ، تۇركىستان تۋريزم ۋنيۆەرسيتەتىندە وتكەن جىلى توقتاتىلعان گرانتتاردى بەرۋدى قايتا جاڭعىرتۋ سياقتى تاقىرىپتار كوتەرىلدى.
ەسەپتى كەزدەسۋدەن كەيىن ازاماتتاردى جەكە قابىلداۋ دا وتكىزىلدى.
سونداي-اق مينيسترلىك جۇرگىزىپ جاتقان جۇمىس جانە الداعى جوسپارلار تۋرالى ايتىپ بەردى.
«ءبىز سپورتتىق ينفراقۇرىلىمدى بەلسەندى دامىتىپ كەلە جاتىرمىز، 2025 جىلعا قاراي 113 سپورت نىسانى سالىنىپ، 26 سپورت نىسانى جوندەلەدى. سونداي-اق، تۇركىستاندا 15 مادەني نىساندى جوندەۋ جانە 3 مادەني نىسان سالۋ جوسپاردا تۇر. رۋحاني استانامىز - تۇركىستاننىڭ وسىپ-وركەندەۋىنە بەيجاي قارامايتىن تۇرعىندارىنا اشىقتىعى جانە سىندارلى ۇسىنىستارى ءۇشىن العىس ايتامىن»، - دەدى اسحات ورالوۆ.