پرەزيدەنت زاڭعا قول قويدى.
مەملەكەت باسشىسى قاسىم-جومارت توقايەۆ "سوت جۇيەسى مەن سۋديالارىنىڭ مارتەبەسى تۋرالى" كونستيتۋسيالىق زاڭعا وزگەرىستەر ەنگىزۋ تۋرالى كونستيتۋسيالىق زاڭعا جانە وعان ىلەسپە زاڭعا قول قويدى، دەپ حابارلايدى Almaty-akshamy.kz اقورداعا سىلتەمە جاساپ.
زاڭعا سايكەس، ەندى قۇقىق قورعاۋ ورگاندارى سۋديالارعا قىسىم كورسەتە المايدى. سۋديالارعا قاتىستى ارنايى جەدەل-ىزدەستىرۋ شارالارى تەك باس پروكۋروردىڭ سانكسياسىمەن عانا جۇرگىزىلەدى.
بۇرىن قۇقىق قورعاۋ ورگاندارى قىلمىستىق ءىس قوزعاماي-اق كەز كەلگەن سۋدياعا قارسى ارنايى جەدەل ىزدەستىرۋ شارالارىن جۇرگىزە الاتىن. بۇل ءۇشىن وبلىس پروكۋرورىنىڭ سانكسياسى جەتكىلىكتى بولاتىن.
"سەناتتا زاڭ جوباسىن تالقىلاي كەلە، سۋديالارعا قاتىستى ارنايى جەدەل-ىزدەستىرۋ شارالارىن تەك باس پروكۋروردىڭ سانكسيا بەرۋىمەن عانا جۇرگىزۋ قاجەت دەگەن توقتامعا كەلدىك. سوندىقتان بۇل كەپىلدى كونستيتۋسيالىق زاڭ دەڭگەيىندە بەكىتۋ ۇسىنىلىپ وتىر"، - دەپ تۇسىندىرگەن ەدى نورمانىڭ ەنگىزىلۋىن سەنات دەپۋتاتى اندرەي لۋكين.
دەپۋتاتتار بۇل نورما سۋديالاردىڭ تاۋەلسىزدىگىن نىعايتادى دەگەن ۇمىتتە.
سونىمەن قاتار اۋداندىق سوتتىڭ ءتوراعالارىن كادر رەزەرۆىندەگى جانە ءوز-وزىن ۇسىنعان ازاماتتاردىڭ اراسىنان سايلاۋ تەتىگى ەنگىزىلدى. سۋديا قاۋىمداستىعى كانديداتتى ءوزى ۇسىنا الادى.
بۇدان بولەك، قابىلدانعان زاڭعا سايكەس، سەنات جوعارعى سوتتىڭ سۋديالارىن دا بالامالى نەگىزدە سايلايدى. سەناتقا كەمىندە ەكى سۋديانىڭ كانديداتۋراسى ۇسىنىلادى.