ەلىمىزدەگى ون ءبىرىنشى حاب تۇركىستاندا اشىلدى

تاۋەلسىزدىك كۇنى قارساڭىندا تۇركىستاندا ÓzgeEpic كرەاتيۆتى حابى اشىلدى.

بۇل – ەلىمىزدەگى ون ءبىرىنشى حاب، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ. 

شىعارماشىلىق كەڭىستىك مەملەكەت باسشىسىنىڭ تاپسىرماسىمەن قۇرىلعان. قاسىم-جومارت توقايەۆ كرەاتيۆ يندۋستريالاردى دامىتۋعا ەرەكشە نازار اۋدارىپ، قازاقستاننىڭ بارلىق ءىرى قالالارىندا حابتار اشۋ مىندەتىن قويدى.

سالتاناتتى ءىس-شاراعا ق ر پارلامەنتىنىڭ دەپۋتاتتارى، ق ر مادەنيەت جانە اقپارات مينيسترلىگىنىڭ وكىلدەرى، «قازپوشتا» اق، جەرگىلىكتى اتقارۋشى ورگاندار جانە ءوڭىردىڭ كرەاتورلارى قاتىستى.

تۇركىستانداعى كرەاتيۆ حاب ق ر مادەنيەت جانە اقپارات مينيسترلىگى مەن «قازپوشتا» اق اراسىنداعى كەلىسىم اياسىندا اشىلدى. ورتالىق اكسيونەرلىك قوعام فيليالدارىنىڭ بىرىندە ورنالاسقان. ىنتىماقتاستىق بويىنشا ورتاق جوبالار جاسالاتىن بولادى.

حابتىڭ اشىلۋىندا ينكليۋزيۆتى كرەاتيۆ يندۋسترياسىن قولداۋعا باعىتتالعان «كورىنبەيتىن الەم» كورمەسى دە ۇسىنىلدى.

اتالمىش الاڭنىڭ اۋدانى – 400 شارشى مەتر. نەگىزگى نازار ءتۇرلى حالىقتاردىڭ قولونەر تۋىندىلارىنا اۋدارىلعان.

تۇركىستان وبلىسىندا بارلىعى 1341 كرەاتيۆ يندۋستريا سۋبەكتىسى تىركەلگەن. ءوڭىر كيىم تىگۋ جانە اكسەسسۋارلار جاساۋ باعىتتارى بويىنشا كوش باستاپ تۇر.