پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا سويلەگەن سوزىندە قازاقستان حالقىنا جولداۋىن جاريالادى. ول ەلىمىزدەگى كوپتەگەن ازاماتتاردىڭ بىرنەشە نەسيەسى بار ەكەنى تۋرالى ايتىپ، بۇل ماسەلەنىڭ وزەكتىلىگىن جانە قوعامدىق قاتەرگە اينالعانىن اتاپ ءوتتى، دەپ حابارلايدى aqshamnews.kz
مەملەكەت باسشىسى وسى باعىتتا ارنايى زاڭدار قابىلدانعانىن جانە حالىقتىڭ ءال-اۋقاتىن جاقسارتۋعا باعىتتالعان شارالاردىڭ قولعا الىنعانىن مالىمدەدى.
پرەزيدەنت وتكەن سەسسيادا پارلامەنتتىڭ جەمىستى جۇمىس اتقارعانىن، سونىڭ ناتيجەسىندە 102 زاڭ قابىلدانعانىن ەرەكشە اتاپ ءوتتى. بۇل زاڭدار قوعامدىق باقىلاۋ، ادام ساۋداسىنا قارسى كۇرەس، عىلىم مەن تەحنولوگيا ساياساتى، جىلۋ ەنەرگەتيكاسى جانە باسقا دا ماڭىزدى ماسەلەلەردى رەتتەيتىن قۇجاتتار بولىپ تابىلادى.
الەۋمەتتىك سالاعا، اسىرەسە بالالاردى قورعاۋعا ەرەكشە نازار اۋدارىلعانىن ايتتى. ۇلتتىق قوردان بالالاردىڭ ەسەپشوتىنا قارجى اۋدارۋ تۋرالى زاڭ قابىلدانىپ، بالالاردى قۇمار ويىندارعا تارتقاندارعا اكىمشىلىك جازا قاراستىرىلعان. سونىمەن قاتار، كامەلەتكە تولماعاندارعا زورلىق-زومبىلىق كورسەتكەنى ءۇشىن بەرىلەتىن جازا كۇشەيتىلدى، ايەلدەر مەن بالالارعا قاتىستى قىلمىستاردىڭ الدىن الۋ بويىنشا زاڭدار قابىلداندى.
مەملەكەت باسشىسى پارلامەنت مۇشەلەرىنە حالىقپەن تىعىز بايلانىستا جۇمىس ىستەپ، «حالىق ۇنىنە قۇلاق اساتىن مەملەكەت» قاعيداسىن ورناتۋعا ىقپال ەتكەنى ءۇشىن ريزاشىلىعىن ءبىلدىردى. سونىمەن بىرگە، الدا ءالى دە كوپ جۇمىس اتقارۋ قاجەت ەكەنىن اتاپ ءوتتى.