باستاپقى جارناسىز باسپانا الۋ تەتىكتەرىن ەنگىزۋ ماڭىزدى.
ءماجىلىس دەپۋتاتى گاۋحار تاناشيەۆا تابىسى از وتباسىلاردى باسپانامەن قامتاماسىز ەتۋگە قاتىستى ۇسىنىس ايتتى، دەپ حابارلايدى Almaty-akshamy.kz
«ەلدە الەۋمەتتىك مۇقتاج وتباسىلاردى باسپانامەن قامتاماسىز ەتۋ جونىندەگى باعدارلامالاردىڭ بار ەكەنى بەلگىلى. الايدا، ولاردى ىسكە اسىرۋ كوپتەگەن سەبەپ بويىنشا قيىن وتەدى. ياعني كەزەكتە ۇزاق تۇرۋ، ونىڭ جىلدار بويى جىلجىماۋى، قارجىلاندىرۋدىڭ شەكتەلۋىنە، سالىنىپ جاتقان تۇرعىن ءۇيدىڭ جەتىسپەۋىنە قاتىستى ماسەلەلەر بار»، - دەدى گ.تاناشيەۆا ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
ونىڭ ايتۋىنشا، «باقىتتى وتباسى» باعدارلاماسى بويىنشا 2019 جىلدان 2022 جىل ارالىعىندا 14 938 نەسيە، «شاڭىراق» باعدارلاماسى اياسىندا 2020 جىلدان 2022 جىل ارالىعىندا 19 394 نەسيە بەرىلگەن. ەلىمىزدە حالىق سانىنىڭ قارقىندى ءوسۋى جاعدايىندا نەسيە ءبولۋدىڭ بۇل كورسەتكىشتەرى وتە تومەن.
«2023 جىلعا «باقىتتى وتباسى» باعدارلاماسىنا 3176 وتىنىشكە، «شاڭىراق» باعدارلاماسىنا 3610 وتىنىشكە 71،9 ملرد تەڭگە ءبولىندى. بۇل باسپانا كەزەگىندە تۇرعان 415 700 ادامنىڭ بيىل تەك 6 786 ءوتىنىشى ماقۇلدانادى دەگەن ءسوز. بۇل تەك 1،6 پايىزىن عانا قۇراپ وتىر. حالىقتىڭ الەۋمەتتىك وسال ساناتتارىن ءتيىستى باسپانامەن قامتاماسىز ەتۋ ءۇشىن قولدانىستاعى يپوتەكالىق باعدارلامالاردى قايتا قاراۋ قاجەت»، - دەدى دەپۋتات.
ونىڭ سوزىنە قاراعاندا، «باقىتتى وتباسى» جانە «شاڭىراق» باعدارلامالارى بويىنشا باستاپقى جارنانى مىندەتتى شارتتاردان الىپ تاستاۋ كەرەك نەمەسە ءۇش ساناتقا (كوپبالالى، تولىق ەمەس وتباسىلارعا، مۇمكىندىگى شەكتەۋلى بالالاردى تاربيەلەپ وتىرعان وتباسىلارعا) تۇرعىن ءۇي سەرتيفيكاتىن بەرۋدى قامتاماسىز ەتۋ قاجەت. باستاپقى جارنانى تولەمەي، باسپانا الۋدىڭ بالامالى تەتىكتەرىن ەنگىزۋدى قاراستىرۋ ماڭىزدى.
«باقىتتى وتباسى» باعدارلاماسىنا تولىق ەمەس وتباسىلاردى قوسۋ كەرەك. يپوتەكالىق نەسيە بەرۋ شارتتارىن قايتا قاراپ، اتالعان ساناتتاعى وتباسىلار ءۇشىن ءتيىستى جاعداي جاساۋ ماڭىزدى»، - دەدى گ. تاناشيەۆا.