ەلىمىزدەگى ەڭ ۇلكەن سۋ قويمالارى

قازاقستانداعى سۋ قويمالاردىڭ بەستىگى.

الماتى وبلىسىنداعى قاپشاعاي سۋ قويماسى اۋدانى بويىنشا ەكىنشى ورىندا. بۇل تۋرالى سۋ جانە يرريگاسيا مينيسترلىگى اقپارات جايالادى، دەپ حابارلايدى Almaty-akshamy.kz.

5 ورىن. سەرگەيەۆ سۋ قويماسى
سولتۇستىك قازاقستان وبلىسىنداعى سەرگەيەۆ سۋ قويماسى ەلىمىزدەگى ەڭ ۇلكەن سۋ قويمالارىنىڭ «بەستىگىنە» كىرەدى. ونىڭ اۋدانى - 117 شارشى شاقىرىم، كولەمى - 693 ملن. تەكشە مەتر. ورتاشا تەرەڭدىگى – 5،9 م. 1969 جىلى قولدانىسقا بەرىلگەن سۋ قويماسى ۇزاق جىلدار بويى سۋ اعىنىن رەتتەپ كەلەدى. مۇندا سەرگەيەۆ گەس ورنالاسقان. سۋ قويماسى ءوڭىردىڭ ەنەرگەتيكالىق جانە كوممۋنالدىق-تۇرمىستىق قاجەتتىلىكتەرىن، سونىمەن قاتار يرريگاسيا جۇيەلەرىن سۋمەن قامتاماسىز ەتىپ وتىر. سول سەبەپتى سولتۇستىك ءوڭىر ەكونوميكاسى ءۇشىن اسا ماڭىزدى نىسان سانالادى.

4 ورىن. ءشۇلبى سۋ قويماسى
شىعىس قازاقستان وبلىسىنداعى ءشۇلبى گەس بوگەتى قالىپتاستىرعان ءشۇلبى سۋ قويماسى بۇگىنگى رەيتينگتە ءتورتىنشى ورىنعا ورنالاستى. بۇقتىرما جانە ءشۇلبى گەس اراسىندا ورنالاسقان نىسان جاناما اعىندى ماۋسىمدىق رەتتەۋدى قامتاماسىز ەتەدى. سۋ قويماسىنىڭ جالپى اۋدانى - 255 شارشى شاقىرىم، كولەمى - 2،39 تەكشە شاقىرىم.

3 ورىن. شاردارا سۋ قويماسى
سىرداريا وزەنىندە ورنالاسقان شاردارا سۋ قويماسى 1967 جىلى پايدالانۋعا بەرىلدى. اۋدانى - 783 شارشى شاقىرىم، ورتاشا تەرەڭدىگى - 6،3 مەتر بولاتىن سۋ قويماسى تۇركىستان وبلىسىنىڭ سۋ شارۋاشىلىعى جۇيەسىنىڭ اجىراماس بولىگى بولىپ تابىلادى. ول اعىندى رەتتەپ قانا قويماي، ايماقتىڭ ەنەرگەتيكالىق جانە يرريگاسيالىق قاجەتتىلىكتەرىن وتەيدى. سونداي-اق شاردارا قالاسىن اۋىز سۋمەن قامتاماسىز ەتىپ وتىر.

2 ورىن. قاپشاعاي سۋ قويماسى
الماتى وبلىسىنداعى ىلە وزەنىندە ورنالاسقان قاپشاعاي سۋ قويماسى اۋدانى بويىنشا ەكىنشى ورىندا. ىلە وزەنىنىڭ اعىنىن رەتتەۋ ءۇشىن سالىنعان سۋ قويماسى نەگىزگى قىزمەتىمەن قاتار يرريگاسيالىق، بالىق ءوسىرۋ جانە رەكرەاسيالىق ماقساتتارعا دا پايدالانىلادى. قويماعا سۋ جىبەرۋ 1970 جىلى باستالدى. بۇگىندە ونىڭ اۋدانى - 1847 شارشى شاقىرىم، كولەمى - 18،14 تەكشە شاقىرىم. سۋ قويماسىنا تۇرگەن، شىلىك، ەسىك، تالعار، قاسكەلەڭ وزەندەرى دە قۇيادى. قاپشاعاي سۋ قويماسى ايماقتىڭ كورىكتى ءارى تۋريستىك ورىندارىنىڭ ءبىرى سانالادى. سونداي-اق ەكونوميكانىڭ ءتۇرلى سالالارى ءۇشىن سۋ رەسۋرسىنىڭ ماڭىزدى كوزى.

1 ورىن. بۇقتىرما سۋ قويماسى
قازاقستانداعى اۋدانى بويىنشا ەڭ ۇلكەن سۋ قويماسى - بۇقتىرما . ونىڭ اۋدانى - 5490 شارشى شاقىرىم، ورتاشا تەرەڭدىگى - 9،6 م. ەرتىس وزەنىندەگى بۇقتىرما گەس بوگەتى قۇرعان سۋ قويماسى 1967 جىلى قولدانىسقا بەرىلدى. نىسان ەنەرگەتيكا، سۋ كولىگى، ونەركاسىپ، بالىق جانە اۋىل شارۋاشىلىعى، اۋىز سۋ قاجەتتىلىكتەرىن رەتتەيتىن كوپ فۋنكسيالى رەزەرۆۋار بولىپ تابىلادى. بۇدان بولەك، بۇقتىرما سۋ قويماسى ۇزاق جىلدار بويى ەرتىس اعىنىن تۇراقتاندىرۋدا ماڭىزدى ءرول اتقارادى. وسى ارقىلى سۋ كولىگىنىڭ قوزعالىسىنا قولايلى جاعداي جاسايدى.