ەلورداداعى "ابۋ دابي پلازا" ورتەندى
10 ناۋرىزدا ساعات 14:57 مينۋتتا ءورت ءسوندىرۋ قىزمەتىنىڭ «101» پۋلتىنە سىعاناق كوشەسى، 60/5 مەكەنجايىندا ءورت شىققانى تۋرالى حابارلاما كەلىپ تۇسكەن، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇل تۋرالى تجم باسپا ءسوز قىزمەتى مالىمدەدى.
شاقىرتۋدىڭ جوعارى ءنومىرى بويىنشا نۇر-سۇلتان قالاسى تجد ءورت ءسوندىرۋ بولىمشەلەرى جەدەل جولدانعان، 4 مينۋتتا بارعان ءورت ءسوندىرۋ قىزمەتكەرلەرى عيماراتتىڭ 1-قاباتىندا جەلدەتكىش كامەراسى جانعانىن انىقتاعان.
زارداپ شەككەندەر مەن قازا بولعاندار جوق. ءورت سوندىرۋشىلەر بارعانشا، قىزمەتكەرلەر مەن كەلۋشىلەر ءوز بەتىنشە ەۆاكۋاسيالانعان. ءورت ورنىندا 16 تەحنيكا مەن جەكە قۇرامنىڭ 61 ادامى جۇمىس ىستەگەن. ءورت 15:24 مينۋتتا سوندىرىلگەن.
ەسكە سالا كەتەيىك، بۇل كەشەن العاش رەت ورتەنىپ تۇرعان جوق. بۇعان دەيىن دە بىرنەشە رەت جالىنعا ورانعان بولاتىن.