جەكە ينۆەستورلارعا زاڭدى تۇلعالاردىڭ قارىزدارىن ساتىپ الۋعا رۇقسات ەتىلمەك
ماجىلىستە وسىنى كوزدەيتىن زاڭ جوباسى ماقۇلداندى، دەپ حابارلايدى Almaty-akshamy.kz Qazaqtn.com سايتىنا سىلتەمە جاساپ.
قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانىڭ سوزىنشە، بۇل جاڭاشىلدىق تەك زاڭدى تۇلعالاردىڭ قارىزىن ساتىپ الۋعا باعىتتالعان. ماقسات قارجى ينستيتۋتتارى بورىشكەردەن نەسيە قارىزى ەسەبىنەن ءوندىرىپ العان مۇلىكتى ەكونوميكالىق اينالىمعا تارتۋ. سەبەبى، كەپىلدىككە الىنعان جەر تەلىمدەرى مەن وندىرىستىك جانە كوممەرسيالىق باعىتتاعى نىساندار جىلدار بويى تۇرالاپ قالعان. بۇگىندە مۇنداي سترەستىك اكتيۆتەردىڭ جالپى قۇنى 1 تريلليون تەڭگەدەن اسىپ جىعىلعان.
"قازىرگى ۋاقىتتا بانكتەر مەن ميكروقارجى ۇيىمدارى وسىنداي ءوندىرىپ الىنعان مۇلىكتى 5 جىلعا دەيىن وزدەرىنىڭ بالانستارىندا ۇستايدى. وسى ۋاقىتتا مۇلىك ەكونوميكالىق اينالىمعا تارتىلمايدى. سول سەبەپتى، وسى زاڭدا تاعى ءبىر نوۆەللا بار. ءۇش جىلعا دەيىن وسى مەرزىم قىسقارتىلدى. وسى ءۇش جىل ىشىندە بانكتەر وسىنداي ءوندىرىپ الىنعان مۇلىكتى تەزىرەك ساتۋ كەرەك. ولار ونى ساتپاعان جاعدايدا ءبىز ولارعا قاداعالاۋ شارالارىن قولداناتىن بولامىز"، - دەيدى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا.
جالپى زاڭ جوباسىندا كاسىپكەردىڭ قارىزىن ساتىپ الۋ قۇقىعىنا يە بولاتىن ينۆەستورلارعا شەكتەۋ قويىلماعان. ءتىپتى شەتەل ازاماتى دا يەمدەنۋى مۇمكىن. الايدا، جەرگە قاتىسى جوق قارىز بولۋى ءتيىس. بۇعان قوسا، ونى اتالمىش زاڭ اياسىندا ەلىمىزدە قۇرىلاتىن سەرۆيستىك كومپانيالارعا سەنىمگەرلىك باسقارۋعا بەرۋ مىندەتتەلەدى. سەرۆيستىك ينستيتۋت ءوز كەزەگىندە سترەستىك اكتيۆتەردىڭ ءوتىمدى نارىعىن قۇرۋ ءۇشىن قاجەتتى جاعداي جاسايدى.
"سەرۆيستىك كومپانيالاردىڭ فۋنكسيالارىن بانكتەردىڭ وسى سترەستىك اكتيۆتەرىدى باسقارۋ جونىندە قۇرىلعان ۇيىمدارى جانە كوللەكتورلىق اگەنتتىكتەر ەندى وسى فۋنكسيالاردى اتقاراتىن بولادى. ولارعا جوعارى تالاپتار قويىلادى. مەنشىك كاپيتالى بويىنشا جانە جۇمىس تاجىريبەسى بويىنشا باسقادا تالاپتار قويىلادى"، - دەيدى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا.
سپيكەردىڭ ايتۋىنشا، بۇل قارىز الۋشى قۇقىعىن قورعاۋدىڭ قوسىمشا تەتىگىن قامتاماسىز ەتۋگە مۇمكىندىك بەرەدى. سەبەبى اتالعان ۇيىمدار ەلىمىزدىڭ قارجى نارىعىن رەتتەۋ جانە دامىتۋ اگەنتتىگىنىڭ رەتتەۋ قۇزىرىنا جاتادى. اگەنتتىك بەلگىلەنگەن تالاپتارعا سايكەس كەلەتىن سەرۆيستىك كومپانيالاردىڭ ءتىزىلىمىن جۇرگىزىپ، ولار تۋرالى اقپاراتتى ءوزىنىڭ ينتەرنەت-رەسۋرسىندا ورنالاستىرادى.