بۇگىندە ەلدەگى 116 بالالار ۇيىندە 3700-گە جۋىق ءجاسوسپىرىم تاربيەلەنىپ جاتىر.
الداعى جىلدارى ەلىمىزدەگى بالالار ۇيلەرىنىڭ سانىن 2 ەسەگە ازايتۋ كوزدەلىپ وتىر. بۇگىن ەلورداداعى قيىن جاعدايعا تاپ بولعان بالالاردى قولداۋ ورتالىعىنا بارعان پرەمەر-مينيستر ءاليحان سمايىلوۆ وسىلاي دەدى، دەپ حابارلايدى Almaty-akshamy.kz
24.kzء-تىڭ اقپاراتى بويىنشا، ورتالىقتا 3 جاستان 18 جاسقا دەيىنگى 66 بالا تاربيەلەنىپ جاتىر، ونىڭ 28ء-ى – جەتىم بوبەك. ءاليحان سمايىلوۆ تاربيەلەنۋشىلەردى بالالاردى قورعاۋ كۇنىمەن قۇتتىقتاپ، ولاردىڭ تۇرمىسىمەن جانە وقۋ جاعدايمەن تانىستى. كەزدەسۋ بارىسىندا ۇكىمەت باسشىسى جەتىم جانە اتا-اناسىنىڭ قامقورلىعىنسىز قالعان بالالارعا قاتىستى سۇراقتارعا ەگجەي-تەگجەيلى جاۋاپ بەردى. بيىل الەۋمەتتىك وسال توپتار ءۇشىن جالدامالى پاتەرگە 100 ملرد تەڭگە بولەنسە، سونىڭ 20%-ى جەتىم بالالاردى باسپانامەن قامتۋعا باعىتتالادى.
«ءبىزدىڭ ماقساتىمىز – الداعى 3 جىلدىڭ ىشىندە بالالار ۇيلەرىنىڭ سانىن 2 ەسەگە قىسقارتىپ، سول جەردەگى بالالاردى بارىنشا وتباسىلارعا ورنالاستىرۋ. تۋىسقاندارىنىڭ، پاتروناتتىق وتباسىلار بار، سولارعا جاعداي جاساۋىمىز كەرەك. سوندىقتان ءبىز ءتيىستى زاڭناماعا وزگەرىس ەنگىزىپ جاتىرمىز»، - دەيدى ق ر پرەمەر-مينيسترى ءاليحان سمايىلوۆ.
سوڭعى 10 جىلدا ەلدەگى بالالار ۇيلەرىنىڭ سانى 41%-كە، ال ونداعى بالالار سانى 65%-كە ازايعان. بۇگىنگى كەزدەسۋ بارىسىندا ەلورداداعى بالالاردى قولداۋ ورتالىعىنىڭ ديرەكتورى بيبىگۇل تاكيسوۆا پرەمەر-مينيسترگە مەكەمە اۋماعىندا سپورت الاڭىن سالۋ جونىندە ءوتىنىش ءبىلدىردى. ءاليحان سمايىلوۆ قالا اكىمى جەڭىس قاسىمبەككە وسى ماسەلەنى قىسقا مەرزىمدە شەشۋدى تاپسىردى.
«كەيىنگى 3 جىلدا 40 بالانى وتباسىلارعا، قامقورلىققا، پاتروناتتىققا ورنالاستىردىق. تۋعان اتا-انالارىنا تابىستالعاندارى بار. بالالاردى وتباسىلارىنا ورالتۋ ماقساتىندا قۇجات راسىمدەۋ، ماتەريالدىق كومەك كورسەتۋ باعىتىندا جۇمىستار اتقارىپ جاتىرمىز»، - دەيدى ومىرلىك قيىن جاعدايعا تاپ بولعان بالالاردى قولداۋ ورتالىعىنىڭ ديرەكتورى بيبىگۇل تاكيسوۆا.
«ءبىز كوتەرگەن پروبلەمالىق ماسەلەلەر – بۇل، ەڭ الدىمەن، باسپانا تۇيتكىلى. ءبىزدىڭ قاۋىمداستىق مالىمەتىنە ساي، بالالار ۇيلەرىنىڭ 62 مىڭ تۇلەگى پاتەر كەزەگىن كۇتىپ وتىر. وسى ماسەلەلەردى ءجيى تالقىلاپ، شەشۋ جولدارىن تابۋ وزەكتى بولىپ وتىر»، - دەيدى قازاقستاننىڭ بالالار ۇيلەرى تۇلەكتەرى قاۋىمداستىعىنىڭ باسشىسى رافاەل گاسانوۆ.