ەلىمىزدە ۆاحتالىق ادىسپەن ىستەيتىن جۇمىسشىلارعا قاي وڭىردە ەڭ جوعارى جالاقى تولەنەدى؟

HeadHunter ونلاين پلاتفورماسى قازاقستانداعى ۆاحتالىق ادىسپەن جۇمىستىڭ 2022 جىلعى قورىتىندىسىن شىعاردى.

2022 جىلى جالپى ەل بويىنشا بۇكىل بوس جۇمىس ورىندارىنىڭ شامامەن 4% نەمەسە 20 مىڭنان استامى ۆاحتالىق جۇمىس بولدى. 

ۆاحتادا ىستەيتىن قىزمەتكەرلەرگە ەڭ ۇلكەن سۇرانىس اتىراۋ وبلىسىندا تىركەلدى. ودان كەيىن قاراعاندى (12%) جانە الماتى (7%) تۇر، دەپ حابارلايدى Almaty-akshamy.kz Elorda.info سايتىنا سىلتەمە جاساپ.

ۆاحتالىق جۇمىس ىزدەگەندەر ىشىندە ەڭ بەلسەندىسى استانادا – 27%. جۇمىس ىزدەۋدەن الماتى، اقتوبە جانە اقتاۋ ۆاحتاشىلارى دا قالىسپايدى – تۇيىندەمەنىڭ 7-12% وسى قالالارعا تيەسىلى. 

ۆاحتا قىزمەتكەرلەرىنە ەڭ ۇلكەن سۇرانىس مىنا سالالاردا: 

- قۇرىلىس، پايدالانۋعا بەرۋ، جوبالاۋ؛ 

- ءوندىرۋشى سالا؛ 

- مەتاللۋرگيا، مەتالل وڭدەۋ. 

الايدا، باسقا ماماندىق وكىلدەرىنە دە جۇمىس كوپ، ولار – اسپازدار، كۇزەتشىلەر، كۇتۋشىلەر، باعدارلاماشىلار، دارىگەرلەر، ءتىپتى ساتۋشىلارعا دا ۆاحتالىق ۇسىنىستار بار. 

2022 جىلى ۆاحتا جۇمىسشىسىنا ورتا ەسەپپەن 350 مىڭ تەڭگە جالاقى ۇسىنىلدى، بۇل – ەل بويىنشا ورتاشا كورسەتكىشتەن جوعارى. 

«ەڭ قىمبات» ۆاحتا جۇمىسىنىڭ رەيتينگىن اتىراۋ مۇناي-گاز سالاسىنداعى جوبالاۋ ينجەنەرى باستاپ تۇر – وعان كومپانيا 1 600 000 تەڭگەدەن اسا ەڭبەكاقى تولەۋگە دايىن. 

ەكىنشى ورىندا – تەڭىز كەنتىندەگى كاسىپورىندا ەق، قت جانە قوق بويىنشا مەنەدجەر (ايلىق 1 500 000 تەڭگەدەن جوعارى). 

ءۇشىنشىسى – قاراعاندىدا تەحنولوگيالىق جابدىقتار مەن قۇبىرلاردى دانەكەرلەۋشى، جالاقىسى 1 300 000 تەڭگەدەن باستالادى.