ءماجىلىستىڭ جالپى وتىرىسىندا دەپۋتات ءسالىمجان ناقپايەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا «112» ءبىرىڭعاي كەزەكشى-ديسپەچەرلىك قىزمەتىنە قاتىستى ماسەلە كوتەردى، دەپ حابارلايدى قازاقپارات ءتىلشىسى.
الەمدىك تاجىريبە كورسەتكەندەي، جەدەل قىزمەتتەردى شاقىرۋدىڭ ءبىرىڭعاي ءنومىرىن قۇرۋ ۇلكەن تيىمدىلىككە يە. «112» ءنومىرى جەكە شۇعىل قىزمەت ەمەس، قيىن جاعدايعا تاپ بولعان ەلىمىزدىڭ ازاماتتارىنىڭ العاشقى ءوتىنىشى بويىنشا كەز كەلگەن ارەكەتكە دايىن بارلىق مەملەكەتتىك ورگاندار ەكەنىن ءتۇسىنۋ قاجەت. بۇگىندە ەل اۋماعىندا «101»، «102» جانە «103» شۇعىل قىزمەتتەردىڭ نومىرلەرى، توتەنشە جاعدايلار مينيسترلىگى جانىنداعى «112» قىزمەتى جۇمىس ىستەيدى، سونداي-اق اتىراۋ، كوكشەتاۋ، قىزىلوردا، وسكەمەن جانە ورال قالالارىندا «112» ءبىرىڭعاي كەزەكشى-ديسپەچەرلىك قىزمەتتىڭ جۇمىس ىستەۋى بويىنشا ىلكى جوبالار ىسكە اسىرىلىپ جاتىر. سوعان قاراماستان، وسى وڭىرلەردە ءالى كۇنگە دەيىن «101»، «102» جانە «103» شۇعىل قىزمەتتەرىنىڭ نومىرلەرى قاتارلاسا جۇمىس ىستەيدى.
پيلوتتىق جوبالار ىسكە اسىرىلاتىن وبلىستاردىڭ جەرگىلىكتى اتقارۋشى ورگاندارىنان الىنعان اقپاراتقا سايكەس، ءاربىر ءوڭىر وسى جوبانى ءوڭىردىڭ بيۋدجەتىنە جانە جوبانى ىسكە اسىرۋ تەتىگىن ءوزىنىڭ تۇسىنۋىنە قاراي اتقارىپ وتىر»، - دەدى س. ناقپايەۆ.
ونىڭ ايتۋىنشا، «112» ءبىرىڭعاي كەزەكشى-ديسپەچەرلىك قىزمەتىنىڭ جۇمىس ىستەۋى بويىنشا ءبىرىڭعاي نورماتيۆتىك قۇقىقتىق بازا جوق. سونىمەن قاتار ديسپەچەرلىك قۇرامدى دايىنداۋ بويىنشا ستاندارتتار ەسكەرىلمەگەن جانە شۇعىل قىزمەتتەردىڭ اقپارات جۇيەلەرى ينتەگراسيالانباعان.
«ەڭ باستىسى، قازىرگە دەيىن پيلوتتىق جوبالار ىسكە اسىرىلىپ جاتقان وڭىرلەردە «112» قىزمەتىن قۇرۋعا، ونىڭ جۇمىس ىستەۋىن ۇيلەستىرۋگە، دامىتۋعا جانە ءادىسنامالىق قامتاماسىز ەتۋگە جاۋاپتى ورتالىق مەملەكەتتىك ورگان ايقىندالماعان. ءبىر سوزبەن ايتقاندا، جەدەل قىزمەتتىڭ بارلىق فۋنكسياسىن ورتالىقتاندىرىلعان تۇردە اتقارۋعا ءتيىس «112» قىزمەتىنىڭ تولىققاندى جۇمىس ىستەپ كەتۋىنە كەرەكتى جاعداي جاسالماعان. ءالى كۇنگە دەيىن «101»، «102»، «103» جەدەل قىزمەتتەرى قاتار جۇمىس اتقارۋدا جانە ولارعا بيۋدجەت قاراجاتى جۇمسالىپ كەلەدى»، - دەدى دەپۋتات.
وسى ورايدا ول جوعارىدا ايتىلعانداردى ەسكەرە وتىرىپ، كەلەسى سۇراقتارعا جاۋاپ بەرۋدى سۇرادى.
«جەرگىلىكتى اتقارۋشى ورگانداردا «112» ءبىرىڭعاي كەزەكشى-ديسپەچەرلىك قىزمەتتىڭ جۇمىس ىستەۋىنە قانداي ورتالىق اتقارۋشى ورگان جاۋاپتى بولادى؟ «112» ءبىرىڭعاي كەزەكشى-ديسپەچەرلىك قىزمەتىنىڭ وپەراتورلارى ءۇشىن ستاندارتتار قاشان قابىلدانادى؟ وپەراتورلاردىڭ جالاقىسى بويىنشا ماسەلە قاشان شەشىلەدى؟ وبلىستاردىڭ، رەسپۋبليكالىق ماڭىزى بار قالالاردىڭ جانە استانانىڭ جەرگىلىكتى اتقارۋشى ورگاندارى 2023 جىلعى 1 قاڭتاردان باستاپ «112» قىزمەتىنىڭ ۇزدىكسىز جۇمىس ىستەۋىن ەنگىزۋگە دايىن با؟» - دەپ سۇرادى ءسالىمجان ناقپايەۆ.