ەلىمىزدە سۋارۋ ماۋسىمى باستالعالى 12 مىڭعا جۋىق شارۋاعا 2 ملرد تەكشە مەتر سۋ بەرىلدى.
بۇگىنگى تاڭدا ۆەگەتاسيا كەزەڭى شتاتتىق كەستەگە ساي ءوتىپ جاتىر، دەپ حابارلايدى Almaty-akshamy.kz سالا مينيسترلىگىنە سىلتەمە جاساپ.
«قازسۋشار» مەكەمەسى بيىل 790 مىڭ گەكتاردان استام اۋىلشارۋاشىلىق القابىن سۋارۋعا 12 ملرد تەكشە مەتر سۋ جىبەرۋدى جوسپارلاپ وتىر. ونىڭ ىشىندە 7،3 ملرد تەكشە مەترى وڭتۇستىك ءوڭىردىڭ ەگىستىكتەرىنە جۇمسالادى.
كاسىپورىن فيليالدارى بيىل ديحاندارمەن سۋ بەرۋ بويىنشا 18758 كەلىسىمشارت جاسادى. بۇل وتكەن جىلمەن سالىستىرعاندا 32%-عا ارتىق.
سۋارۋ ماۋسىمىنا دايىندىق اياسىندا 83 گيدروبەكەت جوندەلىپ، قالپىنا كەلتىرىلدى. سونىمەن قاتار 775 گيدروبەكەت اتتەستاسيادان ءوتتى.
«كاسىپورىن فيليالدارى ارنايى سۋ پايدالانۋعا رۇقسات الدى، سۋ قويمالارىنىڭ جۇمىس كەستەسى بەكىتىلدى، سۋارۋ جەلىلەرىنە ۆەگەتاسياعا دايىندىق اياسىندا جوندەۋ-قالپىنا كەلتىرۋ جۇمىستارى جۇرگىزىلدى. ەلىمىزدەگى سۋارمالى القاپتىڭ نەگىزگى بولىگى وڭتۇستىك وڭىرلەرگە تيەسىلى، بۇل كاسىپورىن ارنالارى ارقىلى سۋارىلاتىن ەگىس القاپتارىنىڭ شامامەن 97%-ى»،- دەدى سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.