قازاقستاندا 285 ەلدى مەكەن ءۇشىن سۋ باسۋدىڭ ىقتيمال ءقاۋپى ساقتالىپ وتىر.
سۋ تاسقىنى كەزەڭى باستالعالى 1،5 مىڭنان استام ادام ەۆاكۋاسيالاندى. بۇل تۋرالى سەناتتىڭ جالپى وتىرىسىندا ق ر توتەنشە جاعدايلار ءمينيسترى يۋريي يلين ءمالىم ەتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«سۋ تاسقىنى كەزەڭىنىڭ باسىنان بەرى رەسپۋبليكا بويىنشا 11 ەلدى مەكەندە 192 تۇرعىن ءۇيدى (بقو - 140، اقتوبە - 41، پاۆلودار - 3، شقو - 6، قاراعاندى - 2) جانە 78 ساياجايدى (اقتوبە-78)، سونداي-اق 3 الەۋمەتتىك نىساندى ەرىگەن قار سۋى باستى. سۋدى بۇرۋ جۇمىستارى تولىعىمەن اياقتالدى. اۋقىمدى سۋ تاسقىنىنا قاراماستان، سۋ باسۋ سالدارىن جويۋ جانە حالىقتى قۇلاقتاندىرۋ شارالارى ۋاقتىلى جۇرگىزىلدى، ادام قۇرباندارىنا جول بەرىلمەدى. بارلىعى 1 595 ادام ەۆاكۋاسيالاندى (بقو - 912، اقتوبە - 520، پاۆلودار - 10، قاراعاندى - 117، شقو - 36)، ولاردىڭ 15ء-ى ۋاقىتشا ەۆاكۋاسيالاۋ پۋنكتتەرىندە ورنالاسقان (بقو)، 1 580ء-ى ۇيلەرىنە ورالدى»، - دەدى يۋ. يلين.
ونىڭ ايتۋىنشا، وبلىستىق جانە جەرگىلىكتى ماڭىزى بار جولداردىڭ 20 ۋچاسكەسىندە سۋ تاسقىنى جالعاسۋدا، 6 ۋچاسكە جانە جەرگىلىكتى ماڭىزى بار 3 كوپىر شايىلىپ كەتكەن.
«سۋ تاسقىنى كەزەڭى جالعاسۋدا. 2022 جىلعى سۋ تاسقىنى كەزەڭىنىڭ ءوتۋ قورىتىندىسى بويىنشا مينيسترلىك ءتيىستى قورىتىندىلارمەن جانە ۇسىنىستارمەن وڭىرلەردە توتەنشە جاعدايلاردىڭ تۋىنداۋىنا ىقپال ەتكەن سەبەپتەر مەن جاعدايلارعا ەگجەي-تەگجەيلى تالداۋ جۇرگىزەتىن بولادى»، - دەدى مينيستر.