اۋىل شارۋاشىلىعى مينيسترلىگىنىڭ جەدەل شتاب وتىرىسىندا ۆيسە-مينيستر امانعالي بەرداليننىڭ توراعالىعىمەن وڭىرلەردى ازىقپەن قامتاماسىز ەتۋ ماسەلەسى تالقىلاندى.
جالپى، ۆيسە-مينيستردىڭ ايتۋىنشا، بيىل كوپتەگەن وڭىردە جەمشوپ دايىنداۋ ءۇشىن قولايلى اۋا رايى جاعدايلارى بايقالادى، بۇل قازگيدرومەت دەرەكتەرىمەن راستالادى. ءقازىردىڭ وزىندە قازاقستاندىق فەرمەرلەر 8 ملن توننا ءشوپ دايىندادى، بۇل بيىلعا جوسپارلانعان 25 ملن توننانىڭ شامامەن 32%-ى، دەپ حابارلايدى Almaty-akshamy.kz.
قازاقپاراتتىڭ دەرەكتەرىنە سۇيەنسەك، اقمولا، تۇركىستان جانە جامبىل وبلىستارى جاقسى قارقىن كورسەتۋدە. تومەن قارقىن پاۆلودار، سولتۇستىك قازاقستان، شىعىس قازاقستان، اتىراۋ جانە ماڭعىستاۋ وبلىستارىندا بايقالادى.
امانعالي بەردالين اقمولا وبلىسىندا اۋىل شارۋاشىلىعى جانۋارلارى سانىنىڭ وسۋىنە قاراماستان، ءشوپ دايىنداۋ جوسپارى قانداي دا ءبىر سەبەپتەرمەن وتكەن جىلدىڭ دەڭگەيىندە قالىپ وتىرعانىن اتاپ ءوتتى. ول اكىمدىكتىڭ نازارىن جوسپارلاردى ۇلعايتۋ جاعىن قايتا قاراۋ جانە الداعى قىستاۋعا قولدا بار مال باسىن 100% ازىقپەن قامتاماسىز ەتۋ قاجەتتىگىنە اۋداردى.
ايتا كەتەيىك، بيىل وڭىرلەردىڭ جەم-شوپ شىعىندارىن سۋبسيديالاۋعا 11،7 ملرد تەڭگە ءبولىندى. قاجەت بولعان جاعدايدا وبلىس اكىمدىكتەرىنىڭ قوسىمشا قاراجات جىبەرۋگە مۇمكىندىگى بار.
بۇدان باسقا، 2022 جىلدىڭ قورىتىندىسى بويىنشا ازىق-تۇلىك كورپوراسياسى 235،2 مىڭ توننا جەم قورىن قۇردى. بۇل جەم قورى مال جانە قۇس شارۋاشىلىقتارىنا ارزانداتىلعان باعامەن ساتىلاتىن بولادى. بۇل رەتتە، جەم-شوپ قورى 2022 جىلدىڭ وتكىزۋ كولەمىنەن 58%-عا اساتىنىن اشم مال شارۋاشىلىعى دەپارتامەنتى ديرەكتورىنىڭ م.ا. باعلان ايمۇرزايەۆ اتاپ ءوتتى.
بيىلدان باستاپ العاش رەت جەم-شوپ دايىنداۋ جۇمىستارىن جۇرگىزۋ ءۇشىن جەڭىلدىكتى باعامەن ديزەل وتىنىنىڭ قوسىمشا كولەمى بولىنەتىن بولادى. اۋىل شارۋاشىلىعى تاۋارىن وندىرۋشىلەردىڭ وتىنىمدەرى بويىنشا اكىمدىكتەر 57،9 مىڭ توننا كولەمىندە قاجەتتىلىك قالىپتاستىرىپ ۇلگەردى. شامامەن جونەلتۋ كەلەسى اپتادا باستالادى.
اعىمداعى جىلى 2023 جىلعا ارنالعان رەسپۋبليكالىق بيۋدجەتتى ناقتىلاۋ شەڭبەرىندە «قازاگروقارجى» اق جارعىلىق كاپيتالىن 20 ملرد تەڭگە سوماسىنا ۇلعايتۋعا جەم-شوپ دايىنداۋ تەحنيكاسى مەن سۋارۋدىڭ ۇتقىر جۇيەلەرىن ساتىپ الۋدى قارجىلاندىرۋ ءۇشىن بيۋدجەتتىك ينۆەستيسيالار ءبولىندى.
بۇدان باسقا، مينيسترلىك وبلىس اكىمدىكتەرى ءۇشىن عىلىمي نەگىزدەلگەن تاسىلدەر مەن نىسانالى ينديكاتورلاردى ەسكەرىپ، قوسىمشا شارالاردى ەنگىزە وتىرىپ، جەمشوپ ءوندىرىسىن دامىتۋدىڭ 2022-2025 جىلدارعا ارنالعان جول كارتاسىن كەڭەيتۋ بويىنشا جۇمىستى باستادى. اتاپ ايتقاندا، جول كارتاسى جاڭا جوعارى ءونىمدى سورتتار مەن بۋدانداردى ەنگىزۋ ارقىلى جەمشوپ داقىلدارىنىڭ ونىمدىلىگىن ارتتىرۋ جونىندەگى ىس-شارالارمەن تولىقتىرىلاتىن بولادى. قۇجاتقا سونداي-اق قۇرعاق ايماق جاعدايىندا جەم-شوپ ءوندىرىسىنىڭ شەتەلدىك تاجىريبەسىن زەردەلەۋ جونىندەگى تارماق ەنگىزىلگەن. بۇدان باسقا، جاڭارتىلعان جول كارتاسى شەڭبەرىندە جەمشوپ دايىنداۋ تەحنيكاسى مەن سۋارۋ جۇيەلەرىن ساتىپ الۋدى قارجىلاندىرۋ، سونداي-اق جەمشوپ ءوندىرۋ جونىندەگى عىلىمي-زەرتتەۋ جۇمىستارىن قارجىلاندىرۋ ءۇشىن جەرگىلىكتى بيۋدجەتتەن قاراجات ءبولۋ جوسپارلانۋدا.
وتىرىس قورىتىندىسى بويىنشا امانعالي بەردالين وبلىس اكىمدىكتەرىنىڭ نازارىن وڭىرلەردە جەمشوپ دايىنداۋ قارقىنىن كۇشەيتۋ، بۇل رەتتە جەمشوپ باعاسىنا مونيتورينگ جۇرگىزۋ جانە باعانىڭ وسۋىنە جول بەرمەۋ قاجەتتىگىنە اۋداردى.