جوبا 2023 جىلى باستالۋى كەرەك ەدى.
قازاقستاندا ساۋساق ءىزىن تىركەۋدى (مىندەتتى تۇردە ساۋساق ءىزىن الۋ) ەنگىزۋ تاعى كەيىنگە شەگەرىلەدى، دەپ حابارلايدى Almaty-akshamy.kz.
سەناتتا «كەيبىر زاڭنامالىق اكتىلەرگە مەملەكەت باسشىسىنىڭ كەيبىر تاپسىرمالارىن ورىنداۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. تالقىلاۋدان كەيىن زاڭ جوباسىن تۇزەتۋلەرىمەن ماجىلىسكە قايتارۋ تۋرالى شەشىم قابىلداندى.
«زاڭ جوباسىن تالقىلاۋ جانە ونى ەكىنشى وقىلىمعا ازىرلەۋ بارىسىندا كەلەسى وزگەرىستەر مەن تولىقتىرۋلاردى ەنگىزۋ قاجەت بولدى. ساۋساق ءىزىنىڭ اۆتوماتتاندىرىلعان اقپاراتتىق جۇيەسىن ىسكە قوسۋ شارالارىن قارجىلاندىرۋدىڭ جەتكىلىكسىزدىگىنە قاتىستى جاعدايعا بايلانىستى ونى تولىق كولەمدە ىسكە قوسۋدى 2023 جىلعى 1 قاڭتاردان 2024 جىلعى 1 قاڭتارعا اۋىستىرۋ ۇسىنىلدى»، - دەدى سەناتور نۇرلان بەكەنوۆ.