مەملەكەتتىك جانە كوممەرسيالىق سەكتورداعى يەسى ناقتىلانباعان دەرەكتەردى جيناقتاي بەرگەن ءجون. بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى.
«جاساندى ينتەللەكتىنىڭ نەگىزگى ارقاۋى – مالىمەتتەر، دەرەكتەر. الايدا، بۇل جەردە ماسەلەنىڭ ەكى جاعى بار ەكەنىن ەسكەرۋ قاجەت، ءبىر جاعىنان، مالىمەتتەر كوپكە قولجەتىمدى بولۋى كەرەك، ەكىنشى جاعىنان، قاۋىپسىزدىك، جەكە مالىمەتتەرگە قول سۇقپاۋ، مالىمەتتەردىڭ ساپالى بولۋىن قامتاماسىز ەتۋ ماسەلەسى بار. ۇكىمەت 87 مەملەكەتتىك مالىمەتتەر بازاسىنان قۇرالاتىن دەرەكقور قالىپتاستىردى. الايدا جاساندى ينتەللەكتىنىڭ وزىق ۇلگىلەرىن جاساۋ ءۇشىن مۇنىڭ ءوزى ازدىق ەتەدى. سوندىقتان مەملەكەتتىك جانە كوممەرسيالىق سەكتورداعى يەسى ناقتىلانباعان دەرەكتەردى جيناقتاي بەرگەن ءجون»، - دەدى پرەزيدەنت.
سونداي-اق، مەملەكەت باسشىسى دەرەكتەردى باسقارۋ جۇيەسىنىڭ ءبىرىڭعاي ارحيتەكتۋراسىن ەنگىزگەن دۇرىس ەكەندىگىن باسا ايتتى.
«ءبىز قۋاتى كۇشتى سۋپەركومپيۋتەر قۇرۋعا كىرىستىك. ول عالىمدارعا عانا ەمەس، سونىمەن قاتار ءبىزدىڭ نارىقتا جۇمىس ىستەيتىن ءتۇرلى كومپانيالارعا دا قولجەتىمدى بولادى. بۇل قادام «اۋقىمدى دەرەكتەردى» كەڭىنەن قولدانۋعا تىڭ سەرپىن بەرەتىنىنە سەنىمدىمىن»، - دەدى قاسىم-جومارت توقايەۆ.