ەلىمىزدە «قازاقستاندىق وتباسىلار-2022» ۇلتتىق بايانداماسى تانىستىرىلدى، دەپ حابارلايدى Almaty-akshamy.kz.
ورتالىق كوممۋنيكاسيالار قىزمەتى الاڭىندا وتكەن باسپا ءسوز كونفەرەنسياسىندا اقپارات جانە قوعامدىق دامۋ مينيسترلىگى جانىنداعى «قازاقستاندىق قوعامدىق دامۋ ينستيتۋتى» كەاق باسقارما ءتوراعاسى نۇربەك ماتجاني «قازاقستاندىق وتباسىلار-2022» ۇلتتىق بايانداماسىن تانىستىردى. سوزىنشە، مۇنداي زەرتتەۋ بۇعان دەيىن 2020 جىلى جۇرگىزىلگەن.
باياندامانىڭ ماقساتى – وتباسى ينستيتۋتى سالاسىنداعى نەگىزگى پروبلەمالار مەن ترەندتەردى انىقتاۋ جانە ەلىمىزدەگى وتباسى ساياساتىن جەتىلدىرۋ ءۇشىن پراكتيكالىق ۇسىنىستار ازىرلەۋ.
مۇنداي زەرتتەۋلەر، ونىڭ ىشىندە دەرەكتەر وتباسى ينستيتۋتىندا بولىپ جاتقان وزگەرىستەر مەن ولارعا وبەكتيۆتى تۇردە بەرىلگەن عىلىمي ساراپتاما قوعام ءۇشىن ماڭىزدى. بايانداما نەگىزگى 4 تاراۋدان تۇرادى. ولاردىڭ ءارقايسىسىندا بىرنەشە ءبولىم بار، - دەپ ايتتى نۇربەك ماتجاني.
ءبىرىنشى تاراۋدا ەلىمىزدەگى وتباسى ساياساتىن جۇزەگە اسىرۋ پروسەسىنە تالداۋ جاسالىپ، ونىڭ زاڭنامالىق جانە ينستيتۋسيونالدىق اسپەكتىلەرى زەرتتەلدى. وسى تۇرعىدا ۇلتتىق بايانداماعا ەنگىزىلگەن قيىن جاعدايداعى وتباسىلارعا پسيحولوگيالىق، الەۋمەتتىك، قۇقىقتىق كومەك كورسەتۋگە باعىتتالعان پيلوتتىق جوبا، وتباسىن قولداۋ ورتالىقتارىنىڭ قىزمەتىنە شولۋدى ەرەكشە اتاپ وتكەن ءجون.
بۇل باعىت الەۋمەتتىك از قامتىلعان وتباسىلاردى مەملەكەتتىك-الەۋمەتتىك قولداۋ ماسەلەلەرىن قاراستىرعان باياندامانىڭ ەكىنشى تاراۋىندا تولىعىراق قامتىلعان. زەرتتەۋدە وسى سالاداعى وزەكتى ماسەلەلەر، ونىڭ ىشىندە تابىس كوزى، جۇمىسسىزدىق، الەۋمەتتىك بەيىمدەلۋ، اتاۋلى الەۋمەتتىك كومەك الۋداعى بيۋروكراتيا سياقتى ماسەلەلەر انىقتالىپ، ونى شەشۋ جولدارى بويىنشا ۇسىنىستار بەرىلدى. ال ءۇشىنشى تاراۋى وتباسىلارداعى اتا-انا الەۋەتىن قالىپتاستىرۋ جانە بالا تاربيەسىنىڭ ەرەكشەلىكتەرىن زەرتتەۋگە ارنالعان، - دەپ ءتۇسىندىردى ينستيتۋت ءتوراعاسى.
سونىمەن قاتار ماتجاني قازاقستاندىقتاردىڭ رەپرودۋكتيۆتى دەنساۋلىعى تۋرالى ستاتيستيكالىق دەرەكتەرگە نازار اۋدارۋ ماڭىزدى ەكەنىن ايتىپ، قۇجاتتاعى جاڭالىققا توقتالىپ ءوتتى.
ۇلتتىق باياندامانىڭ ءتورتىنشى تاراۋىندا العاش رەت سىبايلاس جەمقورلىقتىڭ الدىن الۋ جانە وعان قارسى كۇرەسكە ايەلدەر مەن وتباسى ينستيتۋتىنىڭ ىقپالى تۋرالى ماسەلە قاراستىرىلادى. سونداي-اق العاش رەت اكەلەر ينستيتۋتى جان-جاقتى قاراستىرىلدى، - دەپ اتاپ ءوتتى ول.