وسكەمەندە ەل تاۋەلسىزدىگىنىڭ 30 جىلدىعىنا ارناپ مونۋمەنت سالىنباق
شىعىس قازاقستان وبلىسىنىڭ اكىمى دانيال احمەتوۆتىڭ ايتۋىنشا، مونۋمەنت وبلىس كولەمىندە عانا ەمەس، رەسپۋبليكاداعى بىرەگەي ساۋلەت قۇرىلىسىنا اينالادى، دەپ حابارلايدى Almaty-akshamy.kz.
قازاقپارات اگەنتتىنىڭ اقپاراتى بويىنشا، بۇل تۋرالى وبلىس اكىمى Facebook جەلىسىندەگى جەكە پاراقشاسىندا جازعان.
«بۇگىن وسكەمەندەگى ەسكەرتكىشتەر قۇرىلىسىنىڭ بارىسىن باقىلادىم. ونىڭ ىشىندە ەل تاۋەلسىزدىگىنىڭ 30 جىلدىعىنا ارنالعان اۋقىمدى مونۋمەنت بار. بۇل – ءبىرتۇتاس مەموريالدىق كەشەن، قازاق حاندىعىنىڭ نەگىزىن قالاعان جانىبەك پەن كەرەي جانە قازاقتىڭ ۇلى ءۇش ءبيى بەينەلەنگەن ءبىرىڭعاي كومپوزيسيا. سونداي-اق مۇندا ەل تاريحىنىڭ نەگىزگى كەزەڭدەرى مەن قازاقستاننىڭ تۇڭعىش پرەزيدەنتىنىڭ دايەكسوزدەرى بار بارەلەفتەر بولادى»، - دەيدى ول.
وبلىس اكىمىنىڭ ايتۋىنشا، مونۋمەنت وبلىستاعى عانا ەمەس، بۇكىل قازاقستانداعى بىرەگەي ساۋلەت قۇرىلىسىنا اينالادى.
ونىڭ بيىكتىگى - 12،6 مەتردى قۇراماق.
«16 جەلتوقسانعا دەيىن ەسكەرتكىش سالىنىپ بىتەدى. كەشەننىڭ جالعاسى ەلىمىزدىڭ ءبىرىنشى قورعانىس ءمينيسترى، ارداگەر، كەڭەس وداعىنىڭ باتىرى، حالىق قاھارمانى - ساعادات نۇرماعامبەتوۆ اتىنداعى اللەيا بولماق. مەن قازاقتىڭ وسىنداي نار تۇلعالى ازاماتىمەن جەكە تانىس بولدىم جانە ونى قاراپايىم، ءوز ءىسىنىڭ ناعىز شەبەرى رەتىندە بىلەمىن»، - دەدى دانيال احمەتوۆ.