قازاقستان مۇسىلماندارى ءدىني باسقارماسى ەلىمىزدە قۇران جاتتاپ، قاري اتانىپ، يجازا العىسى كەلەتىندەر ءۇشىن يجازا بەرۋ ورتالىعىن اشۋدى جوسپارلاپ وتىر.
مۇسىلمان ەلدەرىندە قۇران جاتتاۋ ورتالىقتارى بار. قازاقستانداعى ءدىني باسقارما دا مەشىت جانىنداعى ساۋات اشۋ كۋرستارىندا قۇران وقۋ مەن جاتتاتۋدى ۇيرەتىپ كەلەدى. ال قاري بولعىسى كەلەتىندەرگە ارناپ قۇران جاتتاۋ ورتالىقتارىن اشتى. قازىرگى تاڭدا رەسمي تىركەلىپ جۇمىس جاساپ تۇرعان 7 قاريلىق ورتالىق بار، دەپ حابارلايدى Almaty-akshamy.kz Elorda.info-عا سىلتەمە جاساپ.
قمدب ءدىني ءبىلىم جانە كادر دايارلاۋ ءبولىمىنىڭ مەڭگەرۋشىسى سمايىل سەيىتبەكوۆ قازاقستاندا يجازا بەرۋ ورتالىعىن اشۋدى جوسپارلانىپ وتىرعانىن ايتتى.
«يجازا دەمەكشى، ءبىرقاتار قاريلارىمىز يجازا الۋ ءۇشىن تۇركيا مەن مىسىرعا بارىپ، اتاقتى قاريلاردان ءتالىم الىپ جاتىر. يجازا دەگەنىمىز – ارداقتى پايعامبارىمىزدان كۇنى بۇگىنگە دەيىن ءتىنى ۇزىلمەي كەلە جاتقان ۇستازدار تىزبەگىمەن بەرىلەتىن رۇقساتناما. سول يجازانى الۋ وڭاي ەمەس. باس ءمۇفتيدىڭ شەشىمىنە سايكەس يجازا العىسى كەلەتىن قاريلارعا ارناپ، يجازا بەرۋ ورتالىعىن اشۋدى جوسپارلاپ وتىرمىز. ورتالىققا تانىمال شەتەلدىك قاريلاردى شاقىرتۋ جۇمىستارى جۇرگىزىلىپ جاتىر. سەبەبى ولاردىڭ بۇل سالاداعى تاجىريبەسى مول. ماقساتىمىز - سولاردىڭ تاجىريبەسىن مەڭگەرىپ، وتاندىق قاريلاردىڭ دەڭگەيىن كوتەرۋ. ناتيجەسىندە الداعى ۋاقىتتا ءبىزدىڭ دە قاريلارىمىز بىرنەشە قىراعات يەسى بولىپ، يجازا بەرەتىن قاريلارىمىزدىڭ سانىن ارتاتىن بولادى»، – دەيدى سمايىل سەيىتبەكوۆ.