قازاقستاندا 130-عا جۋىق قار بارىسى مەكەندەيدى
«Snow leopard foundation» حالىقارالىق قورى قازاقستانداعى العاشقى قار بارىستارىن ساقتاۋ، وڭالتۋ جانە ءوسىرۋ ورتالىعىن قۇرۋعا رەسەي، جۇڭگو مەن قىرعىزستاننان مامانداردى تارتۋعا نيەتتى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
اتالعان ورتالىق الماتىداعى ىلە-الاتاۋ ۇلتتىق پاركىندە جۇمىس ىستەيتىن بولادى. قازىرگى ۋاقىتتا قور مەن ۇلتتىق پارك اراسىندا عىلىمي قىزمەت تۋرالى شارتقا قول قويىلعان. ورتالىقتى قۇرۋ جوباسى بۇۇدب، يۋنەپ، سونداي-اق دۇنيەجۇزىلىك جابايى تابيعات قورىنىڭ (WWF) قاتىسۋىمەن جۇزەگە اسىرىلادى.
«Snow leopard foundation» قازاقستان اۋماعىندا ورتالىقتى قۇرۋعا قاتىسۋعا تارتۋ ماقساتىندا كاۆكاز قابىلانى مەن امۋر جولبارىسىنىڭ پوپۋلياسياسىن ساقتاۋ جانە ۇلعايتۋ ىسىندە تاجىريبەسى بار رەسەي تاراپىمەن كەلىسسوزدەر جۇرگىزدى.
«جۇڭگو تاراپىنىڭ ىقتيمال قاتىسۋىنا كەلەتىن بولساق، قور بەلگىلى مەسەنات جانە فيلانتروپ دجەك ما قورىمەن ىنتىماقتاستىقتى تالقىلاۋعا نيەتتى. قىتايلىق ارىپتەستەرگە بىرلەسكەن جۇمىس پەرسپەكتيۆالارىن ودان ءارى تالقىلاۋ ءۇشىن قار بارىستارىن ساقتاۋ جانە ءوسىرۋ ورتالىعى بويىنشا پرەزەنتاسيا جولداندى»، - دەلىنگەن حابارلامادا.
ورتالىقتىڭ جۇمىسى قار بارىستارىن زەرتتەۋ بويىنشا العاشقى عىلىمي زەرتحانا قۇرۋدى كوزدەيدى.زەرتحانادا عالىمدار ءۇشىن ارنايى ازىرلەنەتىن قوسىمشالارى بار جەكە دەرەكتەر قورى بولادى. بۇل قازاقستانداعى قار بارىستارىنىڭ ەكوجۇيەسىن ەسەپكە الۋ جانە زەرتتەۋ ناتيجەلەرىن جۇيەلەندىرۋگە مۇمكىندىك بەرەدى. دۇنيەجۇزىلىك جابايى تابيعات قورى بۇل باعىتتاعى سەرىكتەس بولماق. بۇگىنگى كۇنى تالعار شىڭىنىڭ ماڭايىندا 3 000 مەتر بيىكتىكتە 90-نان استام فوتوتۇزاق ورناتىلىپ، «التىن ەمەل» ساياباعىندا جانە تاعى باسقا 23 قار بارىسىنا ID ءتولقۇجاتتار تاعايىندالدى.
عالىمداردىڭ باعالاۋىنشا، قازىرگى ۋاقىتتا قازاقستاندى 130-عا جۋىق قار بارىسى مەكەندەيدى. قوردىڭ ماقساتى - الداعى 10 جىلدا ونىڭ سانىن كوبەيتۋ. بۇدان بۇرىن مالىمدەلگەندەي، وسىدان 3 اپتا بۇرىن قور جانە زوولوگيا ينستيتۋتىنىڭ عالىمدارى الماتى وبلىسىنىڭ «التىن ەمەل» ۇلتتىق پاركىندە قار بارىستارى بار جاڭا ورتاسىن تىركەدى. بۇعان دەيىن وسى ۇلتتىق پاركتە قار بارىسى بولمادى. ولار 20 عاسىردىڭ 50ء-شى جىلدارىندا كسرو كەزىندە-اق جويىلعان بولاتىن.