ەلىمىزدە قانت قىزىلشاسى ەگىسىن كوبەيتۋ ۇسىنىلۋدا

قازاقستاندا قانتتىڭ قۇنى شارىقتاپ بارادى. ەل ايماقتارىندا ءتاتتى تاۋاردىڭ كەلىسى 400-800 تەڭگە ارالىعىن قۇراپ وتىر.

بۇل شەكتى كورسەتكىش ەمەس: كۇزگە قاراي باعا ءتىپتى 1000 تەڭگەگە دەيىن كوتەرىلۋى مۇمكىن دەيدى ماماندار. تاۋار باعاسىنىڭ ايتارلىقتاي كوتەرىلۋىن شيكىزات باعاسىنىڭ قىمباتتاۋى جانە ونى جەتكىزۋدەگى لوگيستيكالىق قيىندىقتارمەن بايلانىستىرادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

قانت توڭىرەگىندەگى دۇربەلەڭ ۇزاققا سوزىلۋى مۇمكىن، دەيدى ساراپشىلار. ماڭىزدى ءونىمنىڭ تاپشىلىعىنا بايلانىستى بيىل بار بولعانى 12 مىڭ تونناعا جۋىق قانت قىزىلشاسى ەگىلدى.

"بۇل داقىلدى وندىرۋگە بايلانىستى شارۋالاردىڭ وزدەرىندە كۇردەلى ماسەلەلەرى بار. ماڭىزدى ماسەلە سۋعا قاتىستى، سەبەبى بۇل – ىلعال سۇيگىش داقىل. ياعني ونى سۋارۋ كەرەك كەزەڭدە، ادەتتەگىدەي، بىزدە سۋ جەتكىلىكسىز بولادى. ءبىز ءالى تۇقىمعا 90% تاۋەلدىمىز. قانت قىزىلشاسىن ءوز بەتىنشە ىرىكتەۋ ءۇشىن كۇردەلى جۇمىستار جاسالۋى كەرەك. سونىمەن قاتار ارنايى تەحنولوگيالاردى قامتاماسىز ەتۋ كەرەك. بۇل ىستەر ءالى ءبىر جولعا قويىلعان جوق. مىنە، وسى سالاعا جاقسى ينۆەستيسيا قاجەت"، - دەيدى «اتامەكەن» ق ر ۇكپ اگروونەركاسىپتىك كەشەن جانە تاماق ونەركاسىبى دەپارتامەنتىنىڭ ديرەكتورى ەربول ەسەنەيەۆ.

«اتامەكەن» سالانى دامىتۋدىڭ الداعى بەس جىلعا ارنالعان باعدارلاماسىن ىسكە قوسۋدى ۇسىنىپ وتىر. بۇل باعدارلاما باسقالارمەن قاتار ەلىمىزدە قانت قىزىلشاسى داقىلدارىن كوبەيتۋدى جانە زاۋىتتاردى تولىق قۋاتىندا جۇكتەۋدى كوزدەيدى. ۇلتتىق پالاتانىڭ ەسەبىنە سايكەس، بۇل ءۇشىن الماتى، جامبىل جانە تۇركىستان وبلىستارىنىڭ شارۋالارىنا شامامەن 104 مىڭ گەكتار جەر قاجەت.