ەلىمىزدە قاي ماماندىق يەلەرى ەڭ جوعارى جالاقى الادى؟

ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندى ەڭبەك بيرجاسى بويىنشا جارتى جىلدا تۇسكەن مالىمەتتەردى قورىتىندىلادى.

ەڭ جوعارى جالاقىنى كەلەسى ماماندىق يەلەرى الادى: ءوندىرىستى دايىنداۋ بويىنشا ينجەنەردىڭ كومەكشىلەرى – 5 ملن تەڭگە، دىبىس رەجيسسەرلەرى – 2،1 ملن تەڭگە، ينۆەستيسيالىق جوبالار جونىندەگى ديرەكتورلار – 1،9 ملن تەڭگە جانە گۋمانيتارلىق عىلىمدار سالاسىنداعى ۋنيۆەرسيتەت پروفەسسورلارى – 1،8 ملن تەڭگە، دەپ حابارلايدى Almaty-akshamy.kz Elorda.info-عا سىلتەمە جاساپ.  

«ەلەكتروندىق ەڭبەك بيرجاسىندا ۇسىنىلعان ەڭ جوعارى اقى تولەنەتىن بوس جۇمىس ورىندارى ريەلتورلار (ورتاشا ەسەپپەن 900 مىڭ تەڭگە)، باس قۇرىلىسشىلار (824 مىڭ تەڭگە) جانە وبەكتيۆتى باقىلاۋ جونىندەگى ينجەنەرلەر (800 مىڭ تەڭگە) بولىپ تابىلادى»، – دەپ اتاپ ءوتتى ەڭبەك مينيسترلىگىندە.

جىل باسىمەن سالىستىرعاندا، بوس لاۋازىمدار سانى 1،8 ەسەگە ارتتى، ال جۇمىس ىزدەنۋشىلەر اراسىندا بەلسەندىلىكتىڭ تومەندەۋى بايقالۋدا، تۇيىندەمەلەر سانى جىل باسىنان بەرى 70،2 مىڭنان 59،9 مىڭعا دەيىن قىسقاردى.

ءبىرىنشى جارتىجىلدىقتىڭ قورىتىندىسى بويىنشا، بوس جۇمىس ورىندارىنىڭ كوپشىلىگى اۋىل شارۋاشىلىعى (10،8 مىڭ بوس ورىن)، تۇرعىن ەمەس جانە تۇرعىن ءۇي وبەكتىلەرىنىڭ قۇرىلىسى (9،8 مىڭ بوس ورىن)، ءبىلىم بەرۋ (6،6 مىڭ بوس ورىن) جانە باسقا قىزمەتتەردە (5 8 مىڭ بوس ورىن) بايقالۋدا. بۇل رەتتە اۋىل شارۋاشىلىعى سالاسىندا جاريالانعان بوس جۇمىس ورىندارىنىڭ جارتىسىنا جۋىعى (47%) جامبىل وبلىسىنا تيەسىلى.

ال بىلىكتىلىگى تومەن قىزمەتكەرلەرگە سۇرانىس 23،4 مىڭنان 50،7 مىڭعا دەيىن، ياعني 2 ەسەدەن استام ءوستى. ونىڭ ءبىر سەبەبى اۋىل شارۋاشىلىعىنداعى ماۋسىمدىق جۇمىستارعا ادەتتەگىدەن كوپ جۇمىسشىلار كەرەك.