ونىڭ سەبەبىن ق ر اۋىل شارۋاشىلىعى ءمينيسترى ەربول قاراشوكەيەۆ ءتۇسىندىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«نانعا قاتىستى احۋال مىناداي. 4 قازاندا نان 11،9 پايىزعا قىمباتتادى. اۋىل شارۋاشىلىعى مينيسترلىگى مەن ازىق-تۇلىك كەلىسىمشارت كورپوراسياسى قاڭتاردان قىركۇيەككە دەين ارزانداتىلعان استىق، تونناسىن 90 مىڭ تەڭگەدەن جەتكىزدى. قازاننان باستاپ جىلدىڭ سوڭىنا دەيىن وڭىرلەر جاڭا استىقتى وزدەرى ساتىپ الىپ جاتىر. بيىل استىق باعاسى جىلدىڭ ورتاسىنداعى باعامەن سالىستىرعاندا ءبىرشاما تومەندەدى»، - دەدى ەربول قاراشوكەيەۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.
ءمينيستردىڭ ايتۋىنشا، نان باعاسىنىڭ قىمباتتاۋىنا بىرنەشە سەبەپ بولۋى مۇمكىن.
«ەلەكتر ەنەرگياسى، كوممۋنالدىق قىزمەتتەر قىمباتتاپ جاتىر. سوندىقتان دا جالپى باعاسى ءوسىمى بار. ونى بايقاپ وتىرمىز. قاڭتاردان باستاپ باعانى تۇراقتاندىرۋ ءۇشىن بارلىق ءىس-شارانى قابىلدايمىز. جالپى، باعانىڭ كۇرت كوتەرىلۋىنە نەگىز جوق. ويتكەنى، ۇن وتكەن جىلمەن سالىستىرعاندا مولىنان ءوندىرىلىپ جاتىر. بيداي ورتاشا جىلدىق تۇسىمەن جوعارى ەكەندىگى انىق. تۇراقتاندىرۋ قورىنا بيىل ميلليون توننا استىق جيناۋدى جوسپارلاپ وتىرمىز. ونىڭ 900 مىڭ تونناسى بيداي بولادى»، - دەدى ول.
سونىمەن قاتار مينيستر الەۋمەتتىك ازىق-تۇلىكتىڭ بارلىعىنىڭ، ونىڭ ىشىندە الەۋمەتتىك ۇننىڭ باعاسى باقىلاۋدا بولاتىندىعىن باسا ايتتى.