ەلىمىزدە مىڭ مەكتەپ جاڭعىرتىلادى

بيىل جاڭا وقۋ جىلىندا 370 مىڭنان استام بالا مەكتەپ تابالدىرىعىن اتتايدى.

بۇگىندە اقمولا، الماتى، جەتىسۋ مەن پاۆلودار وبلىستارى بالالاردى مەكتەپكە تولىق قابىلداپ بولدى. ءوتىنىم بەرۋ 31 تامىزعا دەيىن جالعاسا بەرەدى، دەپ حابارلايدى aqshamnews.kz 24.kz-كە سىلتەمە جاساپ. 

بۇگىندە ەلىمىزدە 8 مىڭ شاماسىندا مەكتەپ بار. ءقازىر ءبىلىم بەرۋ مەكەمەلەرىندە جاڭا وقۋ جىلىنا قىزۋ دايىندىق ءجۇرىپ جاتىر. جىل سوڭىنا دەيىن مىڭ مەكتەپ جاڭعىرتۋدان وتسە، تاعى مىڭ ارنايى كابينەت اشىلادى. ياعني، روبوتوتەحنيكا، حيميا، بيلوگيا، فيزيكا، STEM سەكىلدى زاماناۋي پاندىك كابينەتتەر جاڭادان جابدىقتالاتىن بولادى. سونىمەن قاتار ينكليۋزيۆتى ءبىلىم بەرۋگە دە ەرەكشە نازار اۋدارىلىپ وتىر. «بۇل شارالار اۋىل مەن قالا مەكتەپتەرى اراسىنداعى الشاقتىقتى ازايتۋدى كوزدەيدى»، – دەيدى ماماندار.

 مەرەكە امانگەلدى قىزى، ق ر وقۋ-اعارتۋ مينيسترلىگىنىڭ رەسمي وكىلى:

- ارنايى ءبىلىم بەرۋ ۇيىمدارىنىڭ جەلىسى دە ارتىپ كەلەدى. ينكليۋزيۆتى وقىتۋ ءۇشىن جاعداي جاساعان مەكتەپتەردىڭ سانى 88% دەيىن، ال بالالاردى ارنايى پسيحولوگيالىق-پەداگوگيكالىق قولداۋ ورتالىعىمەن قامتۋ 80% دەيىن ارتتى. ينكليۋزيۆتى ءبىلىم بەرۋگە جاعداي جاساۋ بويىنشا قوسىمشا تالاپتار ازىرلەندى.