ەلىمىزدە جاستار دارىگەرلىك ماماندىقتى كوپ تاڭدايدى

ءبىلىم ءمينيسترى اسحات ايماعامبەتوۆ ءبىلىم ساپاسى بويىنشا ەلدەردىڭ رەيتينگىسى رەتىندە ءجيى قابىلداناتىن زەرتتەۋ تۋرالى جازدى.

بۇل جەردە PISA زەرتتەۋى جايلى ءسوز بولماق، دەپ حابارلايدى Almaty-akshamy.kz Elorda.info سايتىنا سىلتەمە جاساپ.

ءمينيستردىڭ سوزىنشە، PISA-نىڭ كوپتەگەن رەيتينگتەن ايىرماشىلىعى - ۇپايلاردى عانا ەمەس، سونىمەن بىرگە كونتەكستىك فاكتورلاردى دا زەرتتەيتىندىگىندە.

سونداي فاكتورلاردىڭ ءبىرى – 15 جاستاعى وقۋشىلاردىڭ مانساپتىق جوسپارلارى. بۇل تۋرالى ەلىمىزدىڭ باس ۇستازى ءتۇسىندىرىپ جازىپ وتكەن.

قازاقستاندا جاسوسپىرىمدەردىڭ جارتىسىنان كوبى كەڭ تارالعان ماماندىقتاردى تاڭدايدى.

زەرتتەۋدىڭ بارلىق ءۇش سيكلىندە مانساپتىق تاڭداۋدىڭ الدىڭعى قاتارىندا دارىگەر ماماندىعى تۇر. مىسالى، جالپى تاجىريبەلىك دارىگەر PISA-2022 (9%)، PISA-2015 (10%) جانە PISA-2018 (5%) زەرتتەۋىندە ەڭ ءجيى تاڭدالعان.

"جاسوسپىرىمدەردىڭ پەداگوگ ماماندىعىنا قىزىعۋشىلىقتارى ايتارلىقتاي ارتقانىن زەرتتەۋلەر دە كورسەتتى. مەنىڭ ويىمشا، بۇل - ءبىزدىڭ ءمۇعالىم مارتەبەسىن كوتەرۋگە باعىتتالعان جۇمىسىمىزدىڭ ناتيجەسى. زەرتتەۋدىڭ ءۇش سيكلى ىشىندە وسى ماماندىققا قىزىعۋشىلىق تانىتقان وقۋشىلاردىڭ ۇلەسى ەكى ەسەگە نەمەسە 5%-عا ءوستى. اتاپ ايتقاندا، وسى ماماندىقتى تاڭداۋ بويىنشا PISA 2015 زەرتتەۋىندە 7-ورىن بولسا، ال PISA-2022-دە 2-ورىنعا دەيىن كوتەرىلدى. 2022 جىلى وقۋشىلاردىڭ 9%-ى «جالپى ءبىلىم بەرەتىن مەكتەپتەگى ءمۇعالىم» ماماندىعىن بولاشاق ماماندىعى رەتىندە تاڭدادى"، - دەدى ايماعامبەتوۆ.

PISA-2022 زەرتتەۋىنىڭ قورىتىندىسى بويىنشا، تاڭداۋلى ماماندىقتاردىڭ العاشقى وندىعىنا اكت ماماندىقتارى كىرەدى دەپ كۇتىلىپ وتىر.

"سونىمەن قاتار ءجيى تاڭدالاتىن ماماندىقتاردىڭ وندىعىنا جاڭا ماماندىقتار ەندى. بۇل - «ستوماتولوگتار» (4%)، «تاۋارلار مەن كيىم ديزاينەرلەرى» (3%)، «عيماراتتار مەن قۇرىلىستاردىڭ ساۋلەتشىلەرى» (3%)، «سپورت جاتتىقتىرۋشىلارى، نۇسقاۋشىلارى جانە سپورت سالاسىنداعى ماماندار» (2%)، «پسيحولوگتار» (2%)، «كوسمەتولوگتار جانە ولارمەن بايلانىستى ماماندار» (1%)، «جارناما جانە ماركەتينگ سالاسىنداعى ماماندار» (1%)، «گرافيكالىق جانە مۋلتيمەديالىق ديزاينەرلەر» (1%). جاقىندا مەكتەپ تۇلەكتەرىنە جازعان حاتىمدا ايتقان بولاشاق ماماندىقتى تاڭداۋعا قاتىستى ۇسىنىستارىمدى تاعى دا ەسكە سالعىم كەلەدى"، - دەدى ول.