قازاقستاننىڭ اۆتوكولىك وداعى بەرگەن مالىمەت بويىنشا تامىز ايىندا ەلدە 18 مىڭنان استام جاڭا اۆتوموبيل ساتىلعان.
وسىلايشا كولىك ساۋداسى وزىندىك رەكوردتى جاڭارتىپ وتىر. بۇل وتاندىق اۆتوريتەيل تاريحىنداعى ەڭ جاقسى كورسەتكىش، دەپ حابارلايدى Almaty-akshamy.kz 24.kz-كە سىلتەمە جاساپ.
نارىق الەمدىك داعدارىستان سوڭ جاندانىپ، ديلەرلىك ورتالىقتار تانىمال اۆتوبرەندتەردىڭ كولىكتەرىمەن تولىقتى. قازاقستاننىڭ اۆتوكولىك وداعى ساراپشىلارىنىڭ ايتۋىنشا ساتىلىم مودەلدەر سانىنىڭ، اسىرەسە بيۋدجەتتىك اۆتوموبيلدەر قاتارىنىڭ ارتۋىمەن بايلانىستى. قازاقستاندىقتار جاڭا مودەلدەردىڭ تەحنولوگياسى مەن ساپاسىن جاقسى باعالاپ، ءتۇرلى قارجىلىق باعدارلامالاردى قولدانعان. قازاقستاننىڭ اۆتوكولىك وداعى اۆتوموبيل مەن اۆتو بولشەكتەردى لوكوليزاسيالاۋعا ەرەكشە ءمان بەرىپ وتىر.
انار ماقاشيەۆا، قازاقستاننىڭ اۆتوكولىك وداعىنىڭ پرەزيدەنتى: قازاقستاندا شىنايى اۆتوموبيل ءوندىرىسىن قالىپتاستىرۋ ءۇشىن ءبىز ەلىمىزدە اۆتوكومپونەنتتەردى كوپ شىعارۋعا دەن قويامىز. ءبىز قازاقستاندا اۆتوموبيل ارزانداۋ ءۇشىن بارلىق جىگەرىمىزدى جۇمسايمىز.
ەندى اۆتوكومپونەنتتەر «استانا موتورس» كومپانياسىنىڭ تەحنوپاركىندە شىعارىلادى. بۇل جەردە كوپ ۇزاماي ماشيناعا ارنالعان ورىندىق، مۋلتيمەديا مەن پلاستيكالىق بۇيىمدار جاسايتىن ءۇش زاۆود اشىلادى. العاشقى ونىمدەر كەلەسى جىلى پايدالانۋعا بەرىلەدى.
اسقار يبراشيەۆ، Astana Motors Engineering ديرەكتورى:
- مەملەكەت باسشىسى قازاقستان حالقىنا جولداۋىندا ەكونوميكانىڭ وڭدەۋشى سەكتورىن دامىتۋعا، ونىڭ ىشىندە اۆتوموبيل بولىكتەرىن جاساۋدىڭ ماڭىزىن اتاپ ءوتتى. ءبىز شاعىن جانە ورتا بيزنەسكە الماتى مەن قازاقستانداعى اۆتوموبيل كاسىپورىندارىنا قاجەتتى بولشەكتەردى ءوندىرۋ ءۇشىن كلاستەر قۇرامىز. بۇل بولاشاقتا اۆتوموبيل باعاسىنا وڭ ىقپال ەتەدى.
بيىل سەگىز ايدا 120 مىڭنان استام جاڭا كولىك ساتىلسا، سونىڭ 73 پروسەنتى قازاقستاندا جاسالعان. ياعني، قازاقستاندىق كاسىپورىندار قاڭتار-تامىز ايىنىڭ اراسىندا 96 مىڭ اۆتوموبيل شىعارعان. بۇل وتكەن جىلدىڭ وسى كەزەڭىمەن سالىستىرعاندا 41 پروسەنتكە كوپ.