سىياقىنىڭ جالپى سوماسى 77،5 ميلليون تەڭگەدەن اسادى.
الەم بويىنشا توپ-7 بەدەلدى وليمپيادالاردا جۇلدەلى ورىن العان 26 قازاقستاندىق وقۋشى قارجىلاي سىياقى الادى، دەپ حابارلايدى aqshamnews.kz.
2023-2024 وقۋ جىلىنىڭ قورىتىندىسى بويىنشا ەلىمىزدىڭ ۇلتتىق قۇراماسى ەڭ بەدەلدى الەمدىك پاندىك وليمپيادالاردا 2 التىن، 12 كۇمىس، 12 قولا مەدال جانە ءبىر ديپلوم يەلەندى. بۇل وليمپيادالار: IMO (ماتەماتيكادان)، IPhO (فيزيكادان)، IBO (بيولوگيادان)، IChO (حيميادان)، IOL (لينگۆيستيكادان)، IGeO (گەوگرافيادان) جانە IOI (ينفورماتيكادان).
تالانتتى وقۋشىلاردى قولداۋ ماقساتىندا مەملەكەت باسشىسىنىڭ تاپسىرماسىمەن 2022 جىلدان باستاپ حالىقارالىق وليمپيادالاردىڭ جۇلدەلى ورىنداردى يەلەنگەن وقۋشىلارعا جانە ولاردى دايىنداعان پەداگوگتەرگە مەملەكەت تاراپىنان ءبىرجولعى سىياقى تاعايىندالعان. التىن مەدال جەڭىپ العان وقۋشى 1500 ايلىق ەسەپتىك كورسەتكىش (اەك) مولشەرىندە، كۇمىس مەدال ءۇشىن – 1000 اەك، قولا مەدال ءۇشىن – 500 اەك مولشەرىندە اقشالاي سىياقى الادى.
ال التىن مەدال يەگەرىن دايىنداعان پەداگوگكە – بازالىق لاۋازىمدىق ايلىقاقى 26،5 ەسەلەنگەن مولشەرىندە؛ كۇمىس مەدال يەگەرىن دايىنداعان پەداگوگكە – بازالىق لاۋازىمدىق ايلىقاقى 17،5 ەسەلەنگەن مولشەرىندە؛ قولا مەدال يەگەرىن دايىنداعان پەداگوگقا – بازالىق لاۋازىمدىق ايلىقاقى 8،5 ەسەلەنگەن مولشەرىندە بەرىلەدى.
سونىمەن قاتار، حالىقارالىق وليمپيادالاردىڭ جەڭىمپازدارىنا قازاقستاندىق جوو-نىڭ كەز-كەلگەنىنە وقۋعا تۇسۋگە ءبىلىم گرانتى بەرىلەدى. سىياقىنىڭ جالپى سوماسى 77،5 ميلليون تەڭگەدەن اسادى.
ەستەرىڭىزگە سالا كەتەيىك، وتكەن جىلى 23 وقۋشى 65،6 ملن تەڭگە، 20 پەداگوگ جالپى سوماسى 71،4 ملن تەڭگە ءبىرجولعى سىياقى العان بولاتىن. جالپى 12 ءىرى حالىقارالىق جارىسقا قاتىسقان 1218 قازاقستاندىق وقۋشىنىڭ 603ء-ى مەدال يەگەرى اتاندى. ياعني، الەمدىك دودالاردا ەلىمىزدىڭ نامىسىن قورعاعان ءاربىر ەكىنشى قاتىسۋشى جۇلدەلى ورىنعا يە بولدى.