ەلىمىزدە ەكىنشى دەڭگەيلى تۇرعىن ۇيلەر ارزانداي باستادى

سوڭعى ءۇش ايدا باعا ءبىرشاما تومەندەگەن.

ق ر ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسىنىڭ مالىمەتى بويىنشا، ماۋسىم ايىندا جالپى رەسپۋبليكا بويىنشا تۇرعىن ءۇي قۇنى 0،5 پايىزعا ارزانداپ، 486،9 مىڭ تەڭگە بولدى، دەپ حابارلايدى Almaty-akshamy.kz

DataHub ءبىرىنشى كرەديتتىك بيۋرو ساراپشىلارىنىڭ پىكىرىنشە، باعا سوڭعى 4 ايدىڭ ۇشەۋىندە ءبىرشاما تومەندەگەن. ياعني، مامىردان باستاپ باعا وزگەرىسى بايقالادى.

«ەكىنشى دەڭگەيلى تۇرعىن ۇيلەر باعاسى اقپاننان بەرى كوتەرىلگەن جوق. ءقازىر رەسپۋبليكا بويىنشا ورتاشا ەسەپپەن باسپانانىڭ ءار شارشى مەترى جىل باسىنداعى كورسەتكىشتەن گورى ەكى پايىزعا ارزان. ال ءبىر جىل بۇرىنعىدان 1،9%-عا كوپ، ينفلياسيا اياسىندا بۇل – جاقسى كورسەتكىش»، - دەيدى ماماندار.

قاي وڭىردە ءۇي ارزاندادى؟

بەلگىلى بولعانداي، ماۋسىم ايىندا ەكىنشى دەڭگەيلى تۇرعىن ۇيلەر باعاسى 6 ءىرى قالادا تومەندەدى:

كوكشەتاۋ – 4،2%-عا؛

اقتاۋ – 2،5%-عا؛

الماتى – 1،2%-عا؛

وسكەمەن، قاراعاندى ​​جانە قوستانايدا 0،4%-عا ارزاندادى.

رەسمي ستاتيستيكا كورسەتكەندەي، باعا تەك تالدىقورعان قالاسىندا 1،1%-عا وسكەن. قالعان قالالاردىڭ بارىندە ماۋسىمدا ەكىنشى دەڭگەيلى تۇرعىن ءۇي باعاسى وزگەرگەن جوق.

جاڭا سالىنىپ جاتقان ۇيلەردىڭ باعاسى قانداي؟

جاڭا سالىنىپ جاتقان ۇيلەرجىڭ باعاسى ءالى دە قىمباتتاپ جاتىر. وتكەن ايدا جاڭا تۇرعىن ءۇي باعاسى 0،2%-عا (جىل باسىنان بەرى – 1،7%-عا) قىمباتتادى. ءوسىم 4 قالادا بايقالادى:

سەمەي – 2،8%-عا؛

شىمكەنت – 2،1%-عا؛

تالدىقورعان – 1،4%-عا؛

اقتاۋدا 0،5%-عا قىمباتتاعان.

كوكشەتاۋدا جاڭا تۇرعىن ءۇيدىڭ 1 شارشى مەترىنىڭ قۇنى 3،1%-عا ارزاندادى. باسقا قالالاردا باعا وزگەرگەن جوق.

رەسپۋبليكا بويىنشا جاڭا باسپانانىڭ ءار شارشى مەترىنىڭ ورتاشا قۇنى 4– 86،9 مىڭ تەڭگە.

پاتەردى جالعا الۋ قۇنى ارزاندى ما؟

نارىقتا پاتەردى جالعا الۋ باعاسى دا ءبىرشاما ارزاندادى. ماۋسىمدا باعانىڭ 0،5%-عا تومەندەگەنى بايقالادى. دەگەنمەن باعا وزگەرىسىن تەك ءۇش قالادان كورەمىز: الماتىدا (-0،8%) جانە قوستانايدا (-0،2%) باعا تومەندەسە، كەرىسىنشە، شىمكەنتتە (0،9%) ازداپ كوتەرىلگەن.

تۇرعىن ءۇيدىڭ 1 شارشى مەترىن جالعا الۋ ورتاشا ەسەپپەن 4 633 تەڭگە تۇرادى.

نارىقتاعى باعا وزگەرىسى

ساراپشىلار استاناداعى (587،4 مىڭ تەڭگە) جاڭا باسپانانىڭ الماتىداعىدان (549،4 مىڭ تەڭگە) قىمباتتاي باستاعانىن ايتادى. ەكىنشى دەڭگەيلى تۇرعىن ۇيلەر، كەرىسىنشە، الماتىدان «614،2 مىڭ تەڭگە) گورى ەلوردادا (601،7 مىڭ تەڭگە) قولجەتىمدى.

«رەسپۋبليكانىڭ 20 ءىرى قالاسىنىڭ 14-ىندە جاڭا قۇرىلىستار بۇرىن سالىنعان ۇيلەردەن ارزانىراق. ماۋسىمداعى قۇلدىراۋدان كەيىن كوكشەتاۋ قازاقستاننىڭ ەڭ ارزان قالالارىنىڭ بىرىنە اينالدى. بۇل قالاداعى ەكىنشى دەڭگەيلى تۇرعىن ۇيلەر باعاسى 296،7 مىڭ تەڭگە تۇرادى. ەڭ ارزان ۇيلەر تاراز قالاسىندا – 293،9 مىڭ تەڭگە»، - دەيدى ماماندار.

قازاقستان بويىنشا ەكىنشى دەڭگەيلى تۇرعىن ءۇيدى وتەۋ (ساتىپ الۋ باعاسىنىڭ جالعا الۋ قۇنىنا قاتىناسى) ورتا ەسەپپەن 109 ايدى قۇرايدى. بۇل 9 جىلدان ءسال كوبىرەك ۋاقىت. ەڭ ۇزاق كورسەتكىشتەر سەمەي (184 اي نەمەسە 15،3 جىل) جانە تالدىقورعان (178 اي نەمەسە 14،9 جىل) قالالارىندا تىركەلدى. الماتىدا كورسەتكىش 114 اي (9،5 جىل)، استانادا 135 اي (11،3 جىل) بولىپ وتىر.