ەلىمىزدە ەكى قولعا ءبىر كۇرەك ىزدەگەندەر سانى قانشا؟

قازاقستانداعى ەڭبەك نارىعىنداعى جاعداي تۇراقتى

مۇنداي باعانى ۇلتتىق ستاتيستيكا بيۋروسى بەرىپ وتىر، دەپ حابارلايدى Almaty-akshamy.kz Elorda.info-عا سىلتەمە جاساپ. 

2022 جىلدىڭ ءبىرىنشى توقسانىندا قازاقستان ەكونوميكاسىنىڭ ءتۇرلى سالالارىندا 8،8 ميلليون ادام جۇمىسپەن قامتىلعان، ونىڭ ىشىندە 6،7 ميلليون ادام جالدامالى جۇمىس ىستەگەن (ەكونوميكاداعى جۇمىسپەن قامتىلعانداردىڭ جالپى سانىنىڭ 76،1 پايىزى)، ءوزىن-وزى جۇمىسپەن قامتىعاندار - 2،1 ميلليون ادام (جۇمىسپەن قامتىلعانداردىڭ جالپى سانىنىڭ 23،9 پايىزى).

2021 جىلدىڭ ءى توقسانىمەن سالىستىرعاندا جالپى جۇمىسپەن قامتىلعاندار 35،2 مىڭ ادامعا ءوستى، نەگىزىنەن جالدامالى قىزمەتكەرلەر ەسەبىنەن (30،8 مىڭ ادام).

"جۇمىسسىزدار سانى 453،1 مىڭ ادام. جۇمىسسىزدىق دەڭگەيى وزگەرىسسىز - 4،9 پايىز. جۇمىسسىز، جۇمىس ىزدەمەگەن نەمەسە جۇمىس ىستەۋگە دايىن ەمەس 63،1 مىڭ ادام"، – دەپ حابارلادى بيۋرو.

15 پەن 28 جاس ارالىعىنداعى جاستار اراسىنداعى جۇمىسسىزدىق دەڭگەيى 3،9 پايىز، جۇمىس ىستەمەيتىن جانە بىلىممەن نەمەسە وقۋمەن اينالىسپايتىن جاستار ۇلەسى 6،7 پايىز.

2022 جىلدىڭ ءساۋىر ايىنىڭ سوڭىندا ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسپەن قامتۋ ورگاندارىندا 193 مىڭ جۇمىسسىز تىركەلگەن.