پاۆلودار پەداگوگيكا ۋنيۆەرسيتەتىنىڭ قوسىمشا ءبىلىم بەرۋ ينستيتۋتىندا زەينەت جاسىنا دەيىنگى جانە زەينەت جاسىنداعى ازاماتتار ءبىلىم الىپ جاتىر.
ق ر عىلىم جانە جوعارى ءبىلىم مينيسترلىگىنىڭ مالىمەتىنشە، ينستيتۋتتا «كۇمىس ۋنيۆەرسيتەت» جوباسى ىسكە اسىرىلۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىندە مۇندا زەينەت جاسىنا دەيىنگى جانە زەينەت جاسىنداعى 50-دەن استام ستۋدەنت ءبىلىم الادى. ەگدە جاستاعى ادامداردا اپتاسىنا ءبىر رەت كومپيۋتەرلىك ساۋاتتىلىق، ءپىشۋ جانە تىگىن، بەينەلەۋ ونەرى جانە يوگا كۋرستارىنا تەگىن قاتىسۋ مۇمكىندىگى بار. ۋنيۆەرسيتەت وقىتۋشىلارى ولارعا سالاۋاتتى ءومىر سالتى، پسيحولوگيا جانە باسقا دا قىزىقتى تاقىرىپتار بويىنشا دارىستەر وقيدى.
جاراتىلىستانۋ عىلىمدارى جوعارى مەكتەبىنىڭ دوسەنتى، بيولوگيا عىلىمدارىنىڭ كانديداتى باقىتجامال عابدۋلحايەۆا «ءوز دەنساۋلىعىڭ - ءوز قولىڭدا» تاقىرىبىندا دارىستەر وقيدى. ول جۇرەك-قان تامىرلارى جانە باسقا دا اۋرۋلاردىڭ دامۋ ءقاۋپىن ازايتۋعا كومەكتەسەتىن سالاۋاتتى ءومىر سالتىنىڭ نەگىزگى ەرەجەلەرى تۋرالى ايتادى.
ەگدە جاستاعى ادامدار تەك لەكسيالارعا عانا ەمەس، سونىمەن قاتار سەمينارلارعا، شەبەرلىك ساباقتارىنا بەلسەندى قاتىسادى، ولار ءارتۇرلى الەۋمەتتىك-مادەني تاقىرىپتارعا ۇلكەن قىزىعۋشىلىق تانىتادى. «كۇمىس ۋنيۆەرسيتەتتىڭ» ستۋدەنتتەرى وقۋ جىلىنىڭ سوڭىنا دەيىن ساباققا قاتىسادى. سوڭىندا بارلىعىنا سەرتيفيكات بەرىلەدى.