ەلىمىزدە دارى-دارىمەك باعاسى قىمباتتاۋى مۇمكىن

ساراپشىلار ۋكراينا مەن رەسەيدەگى جاعداي فارماسيەۆتيكا سالاسىنا ەداۋىر اسەر ەتەدى دەپ بولجاۋدا.

مۇنداي بولجامدى Energyprom اگەنتتىگىنىڭ ساراپشىلارى جاساعان. نارىقتاعى تاۋارلار ۇلەسىنىڭ 85 پايىزى – يمپورتتىق پرەپاراتتار، دەپ حابارلايدى Almaty-akshamy.kz  Almaty.tv-عا  سىلتەمە جاساپ.  

شەتەلدەن جەتكىزىلەتىن دارى-دارمەكتىڭ ۇلەسى رەسەي، ۋكراينا مەن بەلارۋسكە تيەسەلى ەكەن. سوندىقتان قازاقستان نارىعىنا دارىلەردى تاسىمالداۋعا قاتىستى ءبىرقاتار قيىندىق تۋىنداعان.  

«بىزدە ەكى ۇلكەن ايماق بار. الماتى وبلىسى، ونىڭ ىشىنە الماتى قالاسى دا كىرەدى جانە شىمكەنت قالاسى – بىزدەگى فارماسيەۆتيكا سالاسىندا 66 پايىزعا يمپورتتى تۇتىناتىن، قابىلداپ الاتىن ايماقتار. فارماسيەۆتيكا سالاسىندا دارىلەردىڭ قىمباتتاۋى بايقالادى. قاراپايىم «حيلاك-فورتەنىڭ» 42 پايىزعا ءوسۋى دەگەن سياقتى»، - دەدى قارجىگەر جالعاسبەك اقبولات.

ساراپشىلار الداعى ۋاقىتتا پرەپاراتتاردى تاسىمالداۋ بويىنشا ماسەلەلەردى شەشۋ كەرەك ەكەنىن ايتادى. ءدارى تاپشىلىعىن بولدىرماۋعا الدىن الا جاساقتالعان تۇراقتاندىرۋ قورلارى دا وڭ اسەرىن بەرەدى. دەگەنمەن قالا ءدارىحانالارى مەن تۇرعىندارى ءدارى تاپشىلىعىن ازىرگە سەزىنە قويماعان سياقتى.  

«ەندى بارلىق تاۋار رەسەي مەن ۋكراينادان عانا كەلمەيدى. رەسەي مەن ۋكراينادان كەلەتىن پرەپاراتتاردى ءوزىمىزدىڭ قازاقستاننان شىعاتىن، بولماسا باسقا مەملەكەتتەردەن شىعاتىن پرەپاراتتارمەن الماستىرۋعا بولادى. سونداي-اق بىزدە ءقازىر باعا كوتەرىلىپ، دارىلەردىڭ تاپشىلىعى ونداي ەشتەڭە بولىپ جاتقان جوق»، - دەدى فارماسيەۆت نازەركە ايتجان.

«ءدارىنىڭ باعاسىندا وتە قاتتى وزگەرىس جوق. ءبىراق كەيبىر دارىلەردىڭ باعاسى قىمباتتاپ جاتىر. وزگەرىستەر بار. ءقازىر ناقتى ايتا المايمىن. اتتارىن ۇمىتىپ قالدىم، سوڭعى العان دارىمدە كىشكەنە وزگەرىس بولعان»، «الەمدە بۇكىل باعا كوتەرىلىپ جاتىر. سەبەبى شيكىزاتتىڭ ءبارى رەسەيدە وندىرىلەدى عوي. سوندىقتان كوتەرىلىپ جاتىر. سوعان ەندى ءبىز تۇسىنىستىكپەن قاراۋىمىز كەرەك»، - دەيدى تۇرعىندار.