جىل باسىنان بەرى اۋىل شارۋاشىلىعىنىڭ جالپى ءونىمىنىڭ كولەمى 3،4% - عا كوبەيگەن.
قازاقستان كۇرىش، بيداي جانە ماقتا داقىلدار القابىن قىسقارتتى، دەپ حابارلايدى Almaty-akshamy.kz
اۋىل شارۋاشىلىعى ءمينيسترى ايداربەك ساپاروۆ 2024 جىلعى 23 شىلدەدە وتكەن ۇكىمەت وتىرىسىندا ەگىس القاپتارىن ءارتاراپتاندىرۋ جۇمىستارىنىڭ ناتيجەلەرىن مالىمدەدى.
ونىڭ ايتۋىنشا، جىل باسىنان بەرى اۋىل شارۋاشىلىعىنىڭ جالپى ءونىمىنىڭ كولەمى 3،4% - عا ارتىپ، 1،6 ترلن تەڭگەگە جەتتى.
"بيىلعى جىلى جالپى ەگىس القابى 23،8 ملن گا قۇرادى، مەملەكەت باسشىسىنىڭ تاپسىرماسىنا سايكەس رەسپۋبليكا بويىنشا اعىمداعى جىلعا ارنالعان ەگىس القاپتارىن ءارتاراپتاندىرۋ جوسپارلارىنا قول جەتكىزىلدى. بيداي القابى 450،3 مىڭ گەكتارعا قىسقاردى، سونىمەن بىرگە مايلى داقىلدار القابى 608 مىڭ گەكتارعا، قانت قىزىلشاسى – 9،4 مىڭ گەكتارعا ۇلعايتىلدى. سۋدى كوپ قاجەت ەتەتىن داقىلدار: كۇرىش – 6،9 مىڭ گەكتارعا، ماقتا – 16 مىڭ گەكتارعا دەيىن ازايدى"، -دەدى ايداربەك ساپاروۆ.
ول مونوكۋلتۋرا – بيداي القاپتارىن قىسقارتۋ بويىنشا رەسپۋبليكالىق كورسەتكىش 4،7% - عا اسىرا ورىندالعانىن اتاپ ءوتتى: 430 مىڭ گەكتاردىڭ ورنىنا 450،3 مىڭ گەكتارعا قىسقارتىلدى.
"سۋدى كوپ قاجەت ەتەتىن داقىلدار الاڭىن ازايتۋ بويىنشا جۇرگىزىلگەن جۇمىستىڭ قورىتىندىسى بويىنشا الماتى جانە جەتىسۋ وبلىستارىندا كۇرىش بويىنشا ينديكاتورلارعا قول جەتكىزىلگەن جوق. ماقتا بويىنشا جوسپار تولىعىمەن ورىندالدى، 16 مىڭ گا قىسقارتىلدى. ال قانت قىزىلشاسى بويىنشا رەسپۋبليكالىق جوسپار 10،4% ورىندالمادى. اتاپ ايتقاندا، الماتى وبلىسىندا جوسپار تەك 50% – عا، جامبىل وبلىسىندا 74% – عا ورىندالدى"، - دەدى ايداربەك ساپاروۆ.