قازاقستان ۇكىمەتى 2024 جىلعى 7 تامىزداعى قاۋلىسىمەن بوسقىن مارتەبەسىن بەرۋ، ۇزارتۋ، ايىرۋ جانە توقتاتۋ ەرەجەلەرىنە وزگەرىستەر ەنگىزدى، دەپ حابارلايدى aqshamnews.kz
جاڭا تۇزەتۋلەرگە سايكەس، بوسقىن دەپ تانۋ تۋرالى شەشىم جەرگىلىكتى اتقارۋشى ورگان تاراپىنان شەشىم قابىلدانعان كۇننەن باستاپ بەس جۇمىس كۇنى ىشىندە تابىس ەتىلەدى.
ەگەر ادام بوسقىن دەپ تانۋ تۋرالى شەشىمنىڭ كوشىرمەسىن العاننان كەيىن ءۇش اي ىشىندە بوسقىن كۋالىگىن الۋ ءۇشىن جەرگىلىكتى اتقارۋشى ورگانعا كەلمەسە جانە ونىڭ ءوزى كورسەتكەن مەكەنجايى بويىنشا كەلمەيتىنى تۋرالى حابارلاما كەلىپ تۇسسە، نەمەسە ونىڭ قازاقستاننان تىس جەرگە كەتكەنى تۋرالى اقپارات الىنسا، جەرگىلىكتى اتقارۋشى ورگان بوسقىن مارتەبەسىن بەرۋ تۋرالى شەشىمنىڭ كۇشىن جويادى.
سونىمەن قاتار، ەگەر پانا ىزدەۋشى ادامعا بوسقىن مارتەبەسىن بەرۋدەن باس تارتىلسا، جەرگىلىكتى اتقارۋشى ورگان باس تارتۋ تۋرالى شەشىم قابىلدانعان كۇننەن باستاپ بەس جۇمىس كۇنى ىشىندە باس تارتۋ سەبەپتەرىن جانە شەشىمگە شاعىمدانۋ ءتارتىبىن كورسەتە وتىرىپ، شەشىمنىڭ كوشىرمەسىن تابىستايدى نەمەسە ول تۇرعان جەرى بويىنشا جىبەرەدى. قابىلدانعان شەشىم تۋرالى ۋاكىلەتتى ورگان مەن ىشكى ىستەر ورگاندارىنا حابار بەرىلەدى.