ەلىمىزدە بيىل بالا تۋۋ كورسەتكىشى بويىنشا تاعى دا رەكورد تىركەلۋى مۇمكىن

قازاقستاندا سوڭعى ءۇش جىلدا 1،5 ميلليونعا جۋىق ءسابي دۇنيەگە كەلدى.

بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابالايدى Almaty-akshamy.kz   Elorda.info. سايتىنا سىلتەمە جاساپ.

«قازىرگى تاڭدا قازاقستان، جالپى ورتالىق ازيا ەلدەرى ۇلكەن دەموگرافيالىق وزگەرىستەردىڭ الدىندا تۇر. ول دەموگرافيالىق وزگەرىستەردى جارىلىس دەپ تە ايتۋعا بولادى. تولقىن باستالىپ كەتتى. ونىڭ ۇستىنە ەكىنشى تولقىن قوسىلىپ جاتىر. ول – ميگراسيا تولقىنى. ەكى كۇن بۇرىن بۇۇ دۇنيەجۇزىندەگى 8 ميللياردىنشى تۇرعىن دۇنيەگە كەلگەنىن جاريا ەتتى. 7 ميللياردتان 8 ميللياردقا سوڭعى 12 جىلدا جەتىپ وتىرمىز. ياعني، دۇنيەجۇزىندە حالىق سانى كۇرت ارتۋدا»، - دەدى ول وتباسى، دەموگرافيا جانە گەندەرلىك ساياسات ماسەلەلەرى جونىندەگى حالىقارالىق عىلىمي كونفەرەنسيا بارىسىندا.

ونىڭ اتاپ وتۋىنشە، بۇل تەندەنسيا ەلىمىزگە دە، ايماققا دا قاتتى اسەر ەتەدى.

«سوڭعى ءۇش جىلدا قازاقستاندا 1،5 ميلليونعا جۋىق بالا دۇنيەگە كەلدى. قۋانتاتىن جايت، شۇكىر ەتۋىمىز كەرەك. وسى جىلدىڭ قورىتىندىسىندا 500 مىڭ بالا دۇنيەگە كەلەدى دەگەن بولجام بار. بىلتىر 456 مىڭ بالا، الدىڭعى جىلى 426 مىڭ بالا دۇنيەگە كەلدى. بۇل 3 جىل قاتارىنان دەموگرافيالىق رەكورد سانالادى. سوڭعى رەت مۇنداي رەكورد 1987 جىلى تىركەلىپ، 417 مىڭ ءسابي دۇنيە ەسىگىن اشقان ەدى»، - دەدى ساياسات نۇربەك.