قازاۆتوجول ماماندارىنىڭ ايتۋىنشا، ول تەمىردەن كۇرەك پەن قازاننىڭ قاقپاعى جاسالادى ەكەن.
قازاقستاننىڭ رەسپۋبليكالىق ماڭىزداعى كۇرە جولدارىندا جىل باسىنان بەرى شامامەن 20 ملن تەڭگەنىڭ جول ينفراقۇرىلىمى ەلەمەنتتەرى ۇرلاندى، دەپ حابارلايدى Almaty-akshamy.kz
جول بويىنان كوبىنەسە جول بەلگىلەرى، ءۇي جانۋارلارىنىڭ جولعا شىعىپ كەتۋىنەن قورعايتىن تورلى قورشاۋلار، كاتافوتتار مەن ستروبوسكوپتار ۇرلانادى. بەلگىسىز ادامدار جارىق باعىتتايتىن ەكى ۇلكەن ترانسفورماتوردى ۇرلاعان جاعدايلار دا تىركەلگەن.
"ۇرلانعان جول ينفراقۇرىلىمى ەلەمەنتتەرى كوبىنەسە تۇرمىستىق ماقساتتاردا قولدانىلادى: ءتورتبۇرىشتى جول بەلگىلەرىنەن كۇرەكتەر، دوڭگەلەك ءپىشىندى جول بەلگىلەرىنەن تابالار مەن قازاندارعا ارنالعان قاقپاقتار جاساپ الادى. ال ءۇي جانۋارلارىنىڭ جولعا شىعىپ كەتۋىنەن قورعايتىن تورلاردان ءۇي قورشاۋلارى جاسالسا، جارىقديودتى كاتافوتتار ۆەلوسيپەدتەرگە بەكىتىلەدى ەكەن"، - دەيدى ۆەدومستۆو.
دەسە دە، ۇرلىق بىرتىندەپ ازايىپ كەلەدى دەيدى قازاۆتوجول ماماندارى.
"وتكەن جىلدارمەن سالىستىرعاندا جول ينفراقۇرىلىمى ەلەمەنتتەرىن ۇرلاۋ فاكتىلەرى ازايىپ كەلەدى. ماسەلەن، سالىستىرمالى تۇردە، 2021 جىلى بۇل شىعىن 60 ميلليون تەڭگەدەن اسقان بولاتىن"، - دەيدى جول ماماندارى.
بيىل جولشىلار 8 مىڭعا جۋىق جاڭا جول بەلگىلەرىن، 19 مىڭ دانا كاتافوت، 3،5 مىڭ شارشى مەتر شۋ جولاقتارىن جانە 10 مىڭ سيگنال باعاناسىن ورناتتى. سونىمەن قاتار ماماندار 9،7 مىڭ قۋما مەتر توسقاۋىل قورشاۋلارىن جابدىقتاپ، 23 مىڭ شاقىرىمنان استام جولدا تاڭبا سىزىعىن جاڭارتتى.
179 اۆتوپاۆيلون جانە دەمالىس الاڭدارىن جوندەدى. جول قوزعالىسى ەرەجەلەرىن ساقتاپ، جول قاۋىپسىزدىگىن ناسيحاتتاۋ ماقساتىمەن رەسپۋبليكالىق اۆتوتراسسالاردىڭ بويىندا 300-دەن استام جاڭا اقپاراتتىق پاننو ورناتىلدى.