بۇگىندە قازاقستاندا جاسالاتىن قىلمىستاردىڭ 34%-ى الاياقتىق باعىتىندا.
ونىڭ تەڭ جارتىسى — ينتەرنەت-الاياقتىق، دەپ حابارلايدى aqshamnews.kz.
بۇل تۋرالى باس پروكۋروردىڭ ءبىرىنشى ورىنباسارى تيمۋر تاشىمبايەۆ «قازاقپارات» حالىقارالىق اقپارات اگەنتتىگىنە بەرگەن سۇحباتىندا ايتتى.
— باس پروكۋراتۋرا بايلانىس وپەراتورلارىمەن بىرلەسىپ، «Sim-Box» جابدىعىن انىقتاۋ ادىستەمەسىن ازىرلەدى. بىلتىر وسىنداي 78 قۇرىلعى جانە زاڭسىز پايدالانىلعان 50 مىڭنان استام SIM-كارتا تاركىلەندى. ال، بيىل شامامەن تاعى 30 مىڭ ءنومىر انىقتالدى، — دەدى تيمۋر تاشىمبايەۆ.
قازىرگى تاڭدا نارىقتا ابونەنتتىك نومىرلەردىڭ سانى وتە كوپ، كەز كەلگەن ادام ولاردى شەكتەۋسىز ساتىپ الا الادى، ءتىپتى كەيبىر دۇكەندەر تاۋار العان كەزدە تەگىن تاراتادى. سوندىقتان ولاردى باقىلاۋ وڭايعا سوقپاي تۇر.
— وكىنىشكە قاراي، بۇل ماسەلە رەتتەۋدى قاجەت ەتەدى. قازىرگى تاڭدا بۇل رەتتەۋ جۇزەگە اسىرىلىپ كەلەدى. ماجىلىستە ءبىر قولعا بەرىلەتىن SIM-كارتالار سانىن شەكتەۋ ماسەلەسىن قامتيتىن زاڭ جوباسى قاراستىرىلىپ جاتىر. وندا 10 نەمەسە 5 SIM-كارتا سىندى ءارتۇرلى نۇسقالار ۇسىنىلدى. سونىمەن بىرگە، نەسيە الۋ پروسەسىنە ۇقساس تۇردە SIM-كارتانى تىركەۋ كەزىندە بەينەتەكسەرۋدى ەنگىزۋ ۇسىنىلدى، — دەيدى باس پروكۋروردىڭ ءبىرىنشى ورىنباسارى.