بالالى وتباسىلارعا بەلسەندى قولداۋ كورسەتىلۋدە.
قازاقستاندا اتاۋلى الەۋمەتتىك كومەكتى ەسەپتەمەگەندە بالالى وتباسىلارعا جەتى ءتۇرلى جاردەماقى مەن الەۋمەتتىك تولەمدەر بەرىلەدى، دەپ حابارلايدى Almaty-akshamy.kz
ق ر ەڭبەك جانە حالىقتى الەۋمەتتىك قورعاۋ مينيسترلىگىندە اتاپ وتكەندەي، قازىرگى تاڭدا ەلىمىزدە بالالى وتباسىلارعا رەسپۋبليكالىق بيۋدجەت ەسەبىنەن مەملەكەتتىك جاردەماقىلاردىڭ 5 ءتۇرى جانە مەملەكەتتىك الەۋمەتتىك ساقتاندىرۋ قورىنان (بۇدان ءارى – ءماسق) الەۋمەتتىك تولەمدەردىڭ 2 ءتۇرى تولەنەدى. جۇمىس ىستەيتىن ايەلدەر ءۇشىن جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا ماسق-تەن ءبىرجولعى تولەمدەر تاعايىندالادى. تولەم مولشەرى سوڭعى 12 ايداعى ورتاشا ايلىق تابىسىنا بايلانىستى. 4 ايدىڭ قورىتىندىسى بويىنشا بۇل تولەمدى 90 مىڭنان استام ادام الدى. ءارى قاراي بالا تۋعاندا بەرىلەتىن ءبىرجولعى جاردەماقى.
2024 جىلعى 1 قاڭتاردان باستاپ بالا تۋۋعا ارنالعان ءبىرجولعى جاردەماقى مولشەرى ۇلعايدى. بيىل دۇنيەگە كەلگەن ءبىرىنشى، ەكىنشى جانە ءۇشىنشى بالالارعا – 140 مىڭ تەڭگە، ال ءتورتىنشى جانە ودان كەيىنگى بالالارعا – 232 مىڭ تەڭگەدەن استام تولەنەدى. جىل باسىنان بەرى بۇل جاردەماقىنى 136 مىڭنان استام ادام الدى.
جۇمىس ىستەمەيتىن ايەلدەر بوسانعاننان كەيىن بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى جاردەماقى الادى. كولەمى بالالاردىڭ جالپى سانىنا بايلانىستى جانە 21 266 تەڭگەدەن 32 859 تەڭگەگە دەيىن وزگەرۋى مۇمكىن. ەگەر ايەل بوسانعانعا دەيىن جۇمىس ىستەگەن بولسا، ول مەملەكەتتىك الەۋمەتتىك ساقتاندىرۋ قورىنان وسىنداي الەۋمەتتىك تولەم الا الادى. ونىڭ مولشەرى سوڭعى 2 جىلداعى ورتاشا ايلىق تابىستىڭ 40 پايىزى بولادى.
سونداي-اق 4 جانە ودان دا كوپ بىرگە تۇراتىن كامەلەتكە تولماعان نەمەسە 23 جاسقا دەيىنگى كۇندىزگى بولىمدە وقيتىن ستۋدەنت بالالارى بار كوپبالالى وتباسىلارعا بەرىلەتىن جاردەماقى. جاردەماقى مولشەرى – 4 بالاسى بار وتباسى ءۇشىن 59 183 تەڭگەدەن 8 بالاسى بار وتباسىلار ءۇشىن 118 144 تەڭگەگە دەيىن بالالار سانى بويىنشا سارالانعان. ال ودان دا كوپ بالاسى بار وتباسىلار ءۇشىن بۇل سوما ءار بالا سانىنا بايلانىستى 14 768 تەڭگەگە ارتىپ وتىرادى. بيىل بۇل جاردەماقى 601،8 مىڭ وتباسىنا تولەنەدى، بۇل ماقساتتارعا 474،8 ملرد تەڭگە قاراستىرىلعان.
كوپبالالى انالاردىڭ بەدەلىن ارتتىرۋ ءۇشىن ءومىر بويى اي سايىنعى مەملەكەتتىك جاردەماقى تاعايىندالادى، ول تابىسىنا قاراماستان "كۇمىس القا" جانە "التىن القا" القالارىمەن ماراپاتتالعان ايەلدەرگە تولەنەدى. بيىل بۇل جاردەماقىنى 237 مىڭ 598 اناعا تولەۋ جوسپارلانۋدا، بۇل ماقساتقا رەسپۋبليكالىق بيۋدجەتتەن 70 ملرد تەڭگە قاراستىرىلعان. قازاقستاندا از قامتىلعان وتباسىلارعا ەرەكشە قولداۋ كورسەتىلەدى. وزدەرىڭىز بىلەتىندەي، بالالاردىڭ سانىنا قاراماستان اتاۋلى الەۋمەتتىك كومەك الۋعا قۇقىلى. ونىڭ اياسىندا 1 جاستان 6 جاسقا دەيىنگى ءاربىر بالاعا 1،5 اەك (5 538 تەڭگە) كولەمىندە قوسىمشا تولەمدەر بولىنەدى.
قازاقستاندا مۇمكىندىگى شەكتەۋلى بالالارعا دا جەڭىلدىكتەر قاراستىرىلعان. مىسالى، 7 جاسقا دەيىنگى بالالارعا ەڭ تومەنگى كۇنكورىس دەڭگەيى 1،61، ياعني 2024 جىلى 69 885،7 تەڭگە تولەنەدى، ال ءارى قاراي مۇگەدەكتىك توبىنا بايلانىستى بولادى. سونداي-اق بالالارىنىڭ سىرقاتىنا بايلانىستى ۇيىندە ءوز بەتىنشە ءبىلىم بەرۋگە ءماجبۇر بولعان اتا-انالار دا مەملەكەتتەن وتەماقى الا الادى. ونىڭ مولشەرى وتباسىنىڭ تۇرعىلىقتى جەرىنە بايلانىستى، مىسالى، الماتىدا تولەم 12 اەك نەمەسە 2024 جىلى 44 304 تەڭگە بولدى.