ەلىمىزدە ازىق-تۇلىك باعاسى تومەندەدى

باعانىڭ ەڭ كوپ تومەندەۋى تۇركىستان وبلىسىندا جانە نۇر-سۇلتان قالاسىندا

پرەمەر-مينيستر اسقار مامين ۇكىمەتتىڭ سيفرلىق كەڭسەسىندە ورتالىق مەملەكەتتىك ورگاندار باسشىلارىنىڭ جانە وڭىرلەر اكىمدەرىنىڭ قاتىسۋىمەن الەۋمەتتىك ماڭىزى بار ازىق-تۇلىك تاۋارلارىنىڭ (ءامات) باعالارىن رەتتەۋ ماسەلەلەرى بويىنشا كەڭەس وتكىزدى، دەپ حابارلايدى Almaty-akshamy.kz primeminister.kz-كە سىلتەمە جاساپ.

جيىن بارىسىندا وتكەن اپتادا قازاقستاندا الەۋمەتتىك ماڭىزى بار ازىق-تۇلىك تاۋارلارىنىڭ باعاسى 0،2%-عا تومەندەگەنى بەلگىلى بولدى. باعانىڭ ەڭ كوپ تومەندەۋى تۇركىستان وبلىسىندا جانە نۇر-سۇلتان قالاسىندا (-0،6%)، جامبىل وبلىسىندا (-0،3%)، شىمكەنت قالاسىندا (-0،2%) تىركەلدى.

تاۋارلار بولىنىسىندە رەسپۋبليكا بويىنشا ءسابىز (-2،2%)، كارتوپ (-0،5%)، پياز جانە روجكي (-0،4%)، سيىر ەتى (-0،3%)، كۇرىش (-0،2%)، ءسۇت جانە قاراقۇمىق (-0،1%) باعاسىنىڭ تومەندەۋى بايقالادى. قالعان ونىمدەر بويىنشا باعالار تۇراقتى.

پرەمەر-مينيستر ورتالىق مەملەكەتتىك جانە جەرگىلىكتى اتقارۋشى ورگاندارعا الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ جانە تومەندەتۋ بويىنشا جۇمىستى جالعاستىرۋدى تاپسىردى.

«باعانى تومەندەتۋ قارقىنىن ارتتىرۋ جانە مەرەكە الدىنداعى كەزەڭدە بارلىق قولدانىستاعى قۇرالداردى قولدانا وتىرىپ، بارىنشا باقىلاۋدى قامتاماسىز ەتۋ قاجەت. تاۋار ينتەرۆەنسياسىن ۋاقىتىلى جۇرگىزۋ جانە كەلىسىمشارت جاسالعان كولەمدەردىڭ جەتكىزىلۋىن قامتاماسىز ەتۋ قاجەت. مەرەكە كۇندەرى تاۋارلاردىڭ جاساندى تاپشىلىعىنا جول بەرۋگە بولمايدى»، - دەدى اسقار مامين.