سيۋجەت جۇپار ەسىمدى جاس ايەلدىڭ تاعدىرىنا نەگىزدەلگەن
ارداق ءامىرقۇلوۆ جاڭا ءفيلمىن كورەرمەن نازارىنا ۇسىنادى، دەپ حابارلايدى Almaty-akshamy.kz ۇلتتىق كينونى مەملەكەتتىك قولداۋ ورتالىعىنا سىلتەمە جاساپ.
بەلگىلى قازاقستاندىق رەجيسسەر ارداق ءامىرقۇلوۆ («وتىراردىڭ كۇيرەۋى»، «قوش، گۇلسارى!») «جەل توقتاعان جەر» اتتى جاڭا ءفيلمىن كورەرمەن نازارىنا ۇسىنۋعا دايىندالىپ جاتىر.
تۋىندى ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن.
سيۋجەت جۇپار ەسىمدى جاس ايەلدىڭ تاعدىرىنا نەگىزدەلگەن. حح عاسىردىڭ 30-شى جىلدارىنىڭ باسىندا ەكى كىشكەنتاي بالانىڭ اناسى جالعان ايىپپەن سىبىرگە جەر اۋدارىلعان كۇيەۋىن ىزدەپ جولعا شىعادى.
ساياحات بارىسىندا جۇپار ءتۇرلى قيىندىق پەن سىناقتان ءوتىپ، جول بويىندا قازاقستاننىڭ شەكسىز دالاسىندا اشارشىلىقتان ولۋگە قالعان ادامداردى كەزدەستىرەدى.
ءفيلمنىڭ ءتۇسىرىلىم جۇمىستارى وتكەن جىلدىڭ كۇزىندە الماتى وبلىسى جامبىل اۋدانى مىڭبايەۆ اۋىلىندا، قوسقۇدىق تەمىرجول ستانسياسىندا جانە قونايەۆ قالاسىنىڭ ماڭىندا ءوتتى.
باستى رولدەردى جانار شوپانوۆا، ساليح بەيسەنباي، مەيىرجان مۇساقوجا جانە باسقالار سومداپ شىقتى.
جوبانىڭ سەناريي اۆتورلارى مەن رەجيسسەرلەرى - ارداق ءامىرقۇلوۆ پەن باعلان قۇدايبەرلييەۆ.
ءامىرقۇلوۆتىڭ ايتۋىنشا، فيلم كوپشىلىك كورەرمەنگە ارنالعان، ويتكەنى كارتينا باياندايتىن تراگەديانى ءىس جۇزىندە قازاقتىڭ ءار وتباسى باستان كەشكەن.
فيلم اق-قارا فورماتتا تۇسىرىلگەن.
«اق-قارا فورمات سول جىلدارداعى اتموسفەرانى سەزىندىرۋ ءۇشىن تاڭدالدى، ول كورەرمەندى دەرەكتى شەجىرەگە باعىتتايدى»، - دەيدى رەجيسسەر.
قازىرگى ۋاقىتتا ءفيلمدى مونتاجداۋ جۇمىسى ءجۇرىپ جاتىر.
كارتينانى پروكاتقا شىعارۋ وسى جىلدىڭ كۇزىنە جوسپارلانعان. سونداي-اق، فيلم اۆتورلارى حالىقارالىق كينوفەستيۆالدەرگە دە قاتىسۋ ويدا بار دەيدى.