جوبا 2025 جىلدان باستاپ جۇزەگە اسادى.
باعدارلاماعا سايكەس، بالا تۋۋدى جوسپارلاعان ءاربىر ايەل تەكسەرۋدەن وتۋگە مىندەتتەلمەك، دەپ حابارلايدى aqshamnews.kz
دەنساۋلىق ساقتاۋ مينيسترلىگى انا دەنساۋلىعى باسقارماسىنىڭ باسشىسى شاكيزات حالىقوۆا 2025 جىلدان باستاپ قازاقستاندا 15 پەن 49 جاس ارالىعىنداعى ايەلدەر ءۇشىن ارنايى ازىرلەنگەن "انالار ساۋلىعى" باعدارلاماسى باستالاتىنىن مالىمدەدى. ونىڭ ايتۋىنشا، جوبا ەلىمىزدەگى دەنى ساۋ جانە جوسپارلى جۇكتىلىك سانىن ارتتىرۋ ءۇشىن بالا تۋۋدى جوسپارلاپ وتىرعان ايەلدەردى كەشەندى تەكسەرۋگە باعىتتالعان.
باعدارلامادا جۇكتىلىكتى جوسپارلايتىن فەرتيلدى جاستاعى بارلىق ايەلدەردىڭ دەنساۋلىق يندەكسىن انىقتاۋ ءۇشىن ۋچاسكەلىك دارىگەرلەردىڭ مىندەتتى تەكسەرۋىنەن ءوتۋى قاراستىرىلعان. قىزدار مەن جاسوسپىرىمدەرگە ەرەكشە كوڭىل بولىنبەك.
"ءقاۋىپسىز جۇكتىلىكتى قامتاماسىز ەتۋ ءۇشىن جۇكتىلىككە دەيىن ساۋىقتىرۋ شارالارىن وتكىزۋ ۇسىنىلادى، بۇل جۇكتىلىككە دەيىنگى دايىندىق دەپ اتالادى. بۇل كەشەن دەنساۋلىق جاعدايىن باعالاۋعا جانە ەرلى-زايىپتىلاردى جۇكتىلىككە، دەنى ساۋ بالا تۋۋعا دايىنداۋعا باعىتتالعان دياگنوستيكالىق، پروفيلاكتيكالىق جانە ەمدىك شارالاردى قامتيدى"،-دەدى حالىقوۆا.
مينيسترلىك وكىلى وسى باعدارلاما اياسىندا ەلىمىزدىڭ 20 وڭىرىندە العاش رەت جۇكتىلىككە دايىندىق بويىنشا ۇيلەستىرۋشى ماماندار وقىتىلىپ، كلينيكالىق تەكسەرۋ حاتتاماسى بەكىتىلگەنىن اتاپ ءوتتى.
"پەريناتالدىق ناتيجەلەردى جاقسارتۋ ءۇشىن ءاربىر قىزدى ەرتە جاستان انا بولۋعا دايىنداپ، ۇرپاقتى بولۋ دەنساۋلىعىن نىعايتۋ قاجەت. ءبىز بارلىق ايەلدەردى جۇكتىلىكتى جوسپارلاۋعا، جۇكتى بولماس بۇرىن تەكسەرۋدەن وتۋگە جانە مەديسينا ماماندارىنىڭ ۇسىنىستارىن ورىنداۋعا شاقىرامىز"، – دەدى شاكيزات حالىقوۆا.
باعدارلاما 8 نەگىزگى باعىتتى قامتيدى:
- جاسوسپىرىمدەردىڭ دەنساۋلىعىن ساقتاۋ جانە ءارتۇرلى ينفەكسيالاردىڭ، سونىڭ ىشىندە جىنىستىق جولمەن بەرىلەتىن ينفەكسيالاردىڭ (ججبي) الدىن الۋعا باعىتتالعان ادەتتەردى قالىپتاستىرۋ؛
- پروفيلاكتيكالىق تەكسەرۋلەر: فەرتيلدى جاستاعى ايەلدەر مەن قىزدارداعى پاتولوگيالاردى انىقتاۋ جانە ولاردى ەمدەۋ؛
- "ەرلى-زايىپتىلاردىڭ دەنساۋلىق پاسپورتى" جوباسى: نەكەگە تۇرعانعا دەيىن ەرىكتى پروفيلاكتيكالىق تەكسەرۋلەر جۇرگىزۋ؛
- ايەلدەردى كونسەپسياعا دەيىنگى دايىنداۋ جانە جۇكتىلىك پەن بوسانۋ ناتيجەلەرىن جاقسارتۋ؛
- جۇكتى ايەلدەردى ەرتە انىقتاۋ جانە ساپالى كومەك كورسەتۋ؛
- كونتراسەپتيۆتەرمەن قامتاماسىز ەتۋ؛
- ايەلدەر مەن قىزداردىڭ دەنساۋلىعىن جاقسارتۋ ءۇشىن جاڭا تەحنولوگيالاردى پايدالانۋ.
- سالاۋاتتى ءومىر سالتىن جانە ۇرپاقتى بولۋ دەنساۋلىعىن ناسيحاتتاۋ.