ەلىمىزدەگى ەڭ العاشقى ساۋدا ورتالىعىنا – 60 جىل.
كوپشىلىككە «سۋم» اتاۋىمەن تانىمال ساۋدا ورنى 1961 جىلى الماتىدا اشىلدى. ورتالىق امبەباپ دۇكەن قالانىڭ ورتالىعىندا، جىبەك جولى كوشەسىندە بوي كوتەرگەن، دەپ حابارلايدى Almaty-akshamy.kz.
Almaty.tv سايتىنىڭ مالىمەتىنشە، الماتىدا العاشقى بولىپ اشىلعان مۇنداي ساۋدا ورتالىقتارى كەيىننەن شىمكەنت، قاراعاندى سىندى قالالاردا دا بوي كوتەرە باستاعان. الماتى حالقىن العاش رەت الەمدىك برەندتەرمەن تانىستىرعان ساۋدا ورنىندا ازىق-تۇلىك، شەت مەملەكەتتەن اكەلىنگەن كيىم-كەشەك، تۇرمىستىق تەحنيكا مەن جيھازدىڭ ۇلكەن تاڭداۋى بولعان. ورتالىق باسشىسىنىڭ ايتۋىنشا، ول كەزدەرى تاۋارلارعا دەگەن سۇرانىستىڭ كوپتىگىنەن، سورەلەر دەرەۋ بوساپ قالاتىن.
«سۋم» ۇجىمى ماسكەۋدەگى وليمپيادا ويىندارىنىڭ قوناقتارىنا قىزمەت كورسەتتى. سەبەبى العاشقى رەت بىزدە مەردىگەرلەردىڭ جالعا الۋى سىندى قىزمەت كورسەتۋدىڭ فورمالارى پايدا بولعان ەدى. ول كەزدەرى ساۋدا ورتالىعىنىڭ جىلدىق تاۋار اينالىمى 1000 ميلليون رۋبلدەي بولدى. بۇل وتە ۇلكەن سوما بولاتىن. نىسان اۋقىمدى جوندەۋ جۇمىستارىنان كەيىن 2014 جىلى ساۋلەت ونەرىندەگى Hi-tech ستيلىندە قايتا اشىلدى. وسىلايشا عيماراتتىڭ اۋماعى دا كەڭەيدى»، – دەدى ساۋدا ورتالىعىنىڭ ديرەكتورى سەرگەي يۆانوۆ.
باستاپقىدا ساۋدا ورتالىعى مەملەكەتتىڭ قاراماعىندا بولدى. 90-شى جىلدارداعى توقىراۋدان كەيىن دۇكەن جەكەمەنشىك كاسىپكەرلەردىڭ قول استىنا بەرىلىپ، بىرنەشە رەت جوندەۋدەن ءوتتى.
ساۋدا ورتالىعى قانشا جوندەۋدەن وتسە دە، تاريحي جادىگەر رەتىندە ساقتالعان بولىگى بار. ماسەلەن، مراموردان جاسالعان باسپالداق پەن ونىڭ جيەگى دە 60-شى جىلداردان قالعان. سونداي-اق، ساۋدا ورنىنىڭ قاسبەتىندەگى ورنەكتەرى دە عيماراتتىڭ العاشقى ساۋلەتىندەگى ەلەمەنتتەر ەكەن.
العاشىندا ساۋدا ورتالىعىندا 50-دەي ساتۋ ءبولىمى بولسا، ءقازىر ولاردىڭ سانى ءبىر جارىم مىڭعا جەتكەن.