ەلىمىزدە جەر قويناۋىن يگەرۋگە ارنالعان العاشقى ەلەكتروندى اۋكسيون وتكىزىلەدى
1 تامىزدا E-Qazyna.kz پلاتفورماسىندا قاتتى پايدالى قازبالاردى (قپق) بارلاۋعا قۇقىق بەرەتىن ەلىمىزدەگى العاشقى ەلەكتروندى اۋكسيون ۇيىمداستىرىلادى، دەپ حابارلادى Almaty-akshamy.kz قازاقپاراتقا سالتەمە جاساپ.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتى بويىنشا، وسىعان دەيىن پايدالى قازبالار بويىنشا مۇنداي فورماتتا اۋكسيون وتكىزىلمەگەن.
ەلىمىزدىڭ مينەرالدى-شيكىزات بازاسىن تولىقتىرۋعا ارنالعان ساۋدانى ۇيىمداستىرۋ ءۇشىن اۋقىمدى جۇمىس جۇرگىزىلىپ، ونى وتكىزۋدىڭ ەرەجەلەرى جان-جاقتى قارالىپ، تەتىگى ازىرلەندى. بارلىق ۋچاسكە تۋرالى اقپارات قازاقستان كارتاسىندا كورنەكىلەنىپ، سونداي-اق ستاتيستيكالىق مالىمەت پەن باسقا دا دەرەكتەر بلوگى قاراستىرىلعان. ەلەكتروندى اۋكسيون جەر قويناۋى يگەرۋ باعىتىن دامىتىپ، ينۆەستيسيالىق تارتىمدىلىقتى ارتتىرۋدا ماڭىزدى قادام بولىپ سانالادى.
وسى ۋاقىتقا دەيىن مەملەكەت قپق كەن ورىندارىن يگەرۋگە قۇقىق بەرەتىن ءداستۇرلى اۋكسيونداردى وتكىزىپ كەلگەنىن ايتا كەتەيىك. ەندى تامىزدان باستاپ ساۋدا فورماتى ونلاين رەجىمدە قولعا الىنىپ، اۋكسيون الەمنىڭ كەز كەلگەن جەرىنەن قول جەتىمدى بولادى. بۇدان باسقا اۋكسيونعا قاتىسۋشىلار ءبىر-بىرىن كورمەيدى. دەمەك قانداي دا ءبىر ۋاعدالاستىقتى الدىن الىپ، قاتىسۋشىلار اراسىنداعى باسەكەلەستىكتى ارتتىرادى. ناتيجەسىندە مەملەكەتتىك قازىنانى تولىقتىرۋ ءۇشىن نەعۇرلىم ءتيىمدى ۇسىنىستارعا جول اشىلادى.
اتالعان اۋكسيون 1 تامىزدا ساعات 10:00-دەن باستالادى. ەگەر دە ساۋدا لوتتار جابىلعانعا دەيىن قارقىن السا، وندا 17:00-گە (است) دەيىن جالعاسادى.