بۇل تۋرالى پرەمەر-مينيستر ءاليحان سمايىلوۆ ايتتى.
سونداي-اق وڭىرلەردەگى قازاقستاندىق ۋنيۆەرسيتەتتەردى حالىقارالىق دەڭگەيدەگى جوو-عا اينالدىرۋ بويىنشا باستامالار ىسكە اسىرىلىپ جاتىر، دەپ حابارلايدى Almaty-akshamy.kz
ەلىمىزگە 2029 جىلعا دەيىن 9 بەدەلدى شەتەلدىك ۋنيۆەرسيتەتتى شاقىرۋ جوسپارلانىپ وتىر. بۇل تۋرالى پرەمەر-مينيستر ءاليحان سمايىلوۆ ازيا ۋنيۆەرسيتەتتەرى اليانسى (اۋا) ءسامميتىنىڭ اياسىندا استانا قالاسىندا ءوتىپ جاتقان ۇيىم پرەزيدەنتتەرىنىڭ فورۋمىندا ايتتى.
سامميت – اليانستىڭ نەگىزگى ءىس-شارالارىنىڭ ءبىرى، سونداي-اق عالىمدار، زەرتتەۋشىلەر مەن ساياساتكەرلەر جوعارى ءبىلىم بەرۋ سالاسىنداعى وزەكتى ماسەلەلەر مەن دامۋ ۇردىستەرىن تالقىلايتىن پلاتفورما.
بيىل نازاربايەۆ ۋنيۆەرسيتەتى قابىلداۋشى تاراپ بولىپ وتىر.
COVID-19 پاندەمياسى، تەحنولوگيالىق ريەۆوليۋسيا، جاساندى ينتەللەكتتىڭ دامۋى جانە باسقا دا فاكتورلاردان تۋىنداعان الەمدەگى قارقىندى وزگەرىستەر ءارتۇرلى سالالاردا، اسىرەسە، ءبىلىم بەرۋ سالاسىندا يننوۆاسيالىق شەشىمدەرگە دەگەن سۇرانىستى ارتتىرۋدا، – دەدى ءاليحان سمايىلوۆ.
الەمدەگى ۇردىستەردى ەسكەرە وتىرىپ، قازاقستان 2027 جىلعا قاراي عىلىمي زەرتتەۋلەردى قارجىلاندىرۋ دەڭگەيىن ءجىو-نىڭ 1%-نا دەيىن جەتكىزۋدى جوسپارلاپ وتىر. سونىمەن قاتار ەكونوميكانىڭ بارلىق سالاسىن قارقىندى سيفرلاندىرۋ اياسىندا ۇكىمەت ەڭبەك نارىعىنا قاجەتتى مامانداردى ءتيىستى دەڭگەيدە دايىنداۋ ءۇشىن جوعارى وقۋ ورىندارىنىڭ سيفرلىق ارحيتەكتۋراسىن قالىپتاستىرۋ بويىنشا جۇمىس جۇرگىزىپ كەلەدى.
وعان قوسا، بەدەلدى شەتەلدىك ۋنيۆەرسيتەتتەرمەن اراداعى ىنتىماقتاستىق نىعايىپ جاتىر. ماسەلەن، ءتورت حالىقارالىق جوو قازاقستان وڭىرلەرىندە ءوز فيليالدارىن اشتى. ولاردىڭ اراسىندا University of Arizona مەن Heriot-Watt University بار. 2029 جىلعا دەيىن كەم دەگەندە تاعى 9 تانىمال ۋنيۆەرسيتەتتى شاقىرۋ جوسپارلانىپ وتىر.
ءقازىر وڭىرلەردەگى قازاقستاندىق ۋنيۆەرسيتەتتەردى حالىقارالىق دەڭگەيدەگى وقۋ ورىندارىنا اينالدىرۋ بويىنشا باستامالار ىسكە اسىرىلىپ جاتىر. ول ءۇشىن وقۋ ورىندارىن جابدىقتاۋ جانە زەرتتەۋ زەرتحانالارىن قۇرۋ جۇمىستارى جۇرگىزىلۋدە. اتالعان ورتالىقتار وڭىرلەردەگى ستاندارتتى كوتەرىپ، اكادەميالىق جانە عىلىمي دامۋعا ىقپال ەتەتىن بولادى، – دەدى ءاليحان سمايىلوۆ.