ەڭبەك جانە حالىقتى الەۋمەتتىك قورعاۋ مينيسترلىگى ۇسىنعان كەشەندى جوسپاردا الداعى 5-10 جىلعا جاسالعان بولجامدار بار. وعان سايكەس، ەكونوميكانىڭ 9 سالاسى بويىنشا 239 جاڭا ماماندىق پايدا بولادى، دەپ حابارلايدى Almaty-akshamy.kz Inform.kz-كە سىلتەمە جاساپ.

«جاڭا تەحنولوگيالاردىڭ شىعۋ قارقىنى ارتىپ كەلەدى. جاساندى ينتەللەكت، روبوت قۇراستىرۋ سياقتى پروسەستەر قوعام ءومىرىنىڭ اجىراماس بولىگىنە اينالدى. ناتيجەسىندە ەڭبەك نارىعىندا جاڭا ماماندىقتار پايدا بولادى. الدىن الا ساراپتاما بويىنشا، قازاقستاندا الداعى 5-10 جىلدا ەكونوميكانىڭ 9 سالاسى بويىنشا 239 جاڭا ماماندىق پايدا بولاماق. ال، بۇگىندە بار 95 ماماندىقتىڭ جۇمىس فورماتى مەن باعىتى وزگەرەدى. سونداي-اق، ەلدەگى جۇمىس ورىندارىنىڭ 52 پايىزى اۆتوماتتاندىرىلادى»، - دەلىنگەن ۆەدومستۆونىڭ عىلىمي زەرتتەۋگە نەگىزدەلگەن بولجامىندا.

قۇزىرلى ورگان الدىعى 10 جىلدا نارىقتا قاجەت بولاتىن جاڭا مامانداردى دايارلاۋ ءۇشىن جاعداي جاسالاتىنىن ءمالىم ەتتى. ول ءۇشىن ءداستۇرلى ءبىلىم بەرۋ باعىتىن وزگەرتىپ، جاستاردى زاماناۋي تەحنولوگيالار نارىعىنا يكەمدەي وتىرا وقىتۋدى ۇسىنادى.